Tumaýdan óz betinshe emdelýge abaılaý kerek - ımmýnolog
Qazaq medıtsınalyq úzdiksiz bilim berý ýnıversıtetiniń mıkrobıologııa, vırýsologııa, jalpy ımmýnologııa, gıgıena, epıdemıologııa syndy irgeli ǵylymdar kafedrasynyń meńgerýshisi Raýshan Tesova-Berdalına epıdemıologııalyq ahýalǵa sıpattama berdi.
«Barlyq respıratorlyq aýrýlar sııaqty SARS-CoV-2 ınfektsııalary basqa da vırýstar tárizdi sýyq tııý maýsymy kezinde órshýi ábden yqtımal. Olar grıpp, paragrıpp, qyzylsha, JRVI, menıngokokk, strepotkokk, stafılokokk, dıfterııa sııaqty bakterııalarmen qosarlasa damýy múmkin. Bul álbette aýyr bolady», - dedi maman.
Dáriger halyqty ózin-ózi emdep, aldyn ala antıbıotık, dári qoldanýdan bas tartýǵa shaqyrdy.
«Immýndik stımýlıatsııa, modýlıatsııa, antıbıotıkalyq terapııa – emniń barlyq osy túrleri zerthanalyq dıagnostıkalaý arqyly jáne dárigerdiń baqylaýymen júrgizilýi tıis. Ózin ózi emdeý arqyly aýyrǵannan da kóp qıyndyqqa ushyraý ábden múmkin. Óz aǵzańyzdy dárilermen toltyryp, osy preparattarǵa mıkrobtar úshin jaǵdaı jasaýdyń qajeti joq. Óıtkeni keıin aýyrǵan kezde bul preparattardyń áseri bolmaıdy», - dep atap ótti ol.
Sonymen birge, Raýshan Tesova-Berdalına juqtyrýdan saqtanýda jeke qorǵanysty qamtamasyz etý maqsatynda maskany durys taǵýǵa keńes beredi.
«Maska tolyqtaı aýyz ben muryndy jaýyp turýy kerek. Ylǵaldy jáne dymqyl maskany jańasyna, qurǵaǵyna aýystyrý kerek jáne birrettik maskany qaıtalap qoldanýǵa bolmaıdy. Maskany shesher kezde, onyń betki jaǵyna qol tıgizbeýge tyrysyńyz. Qolyńyzdy sabynmen jáne spırttik quralmen muqııat jýyńyz», - dedi maman.
Qazirgi kúz-qys maýsymynda jeke gıgıenany, áleýmettik qashyqtyqty saqtaý, eń bastysy - maýsymǵa qaraı kıinip, múmkindiginshe sýyq tıgizbeı, júıeli jáne sapaly tamaqtanýǵa keńes beriledi.