Tumaý men koronavırýs 2 jasqa deıingi balalar úshin qaýipti – Dınagúl Baesheva

ASTANA. QazAqparat – Ótken jyly koronavırýs juqtyrǵan balalar kóp anyqtalsa, bıyl tumaýmen aýyrǵan bala odan kóp. Bul týraly «Astana medıtsına ýnıversıtet» AQ balalar juqpaly aýrýlary kafedrasynyń meńgerýshisi Dınagúl Baesheva aıtty, dep habarlaıdy QazAqparat tilshisi.

«Jeltoqsan, qańtar aılarynda JRVI jáne tumaýmen aýyratyndardyń sany artty. Ótken jyly koronavırýspen aýyratyn balalar kóp boldy. Al bıyl JRVI jáne tumaýmen aýyrǵan bala kóp. Tumaý balalarda, ásirese buryn koronavırýspen aýyrǵan balalarda aýyr ótip jatyr. Ásirese tumaý men koronavırýs eki jasqa deıingi balalar úshin qaýipti», - dedi D. Baesheva Ortalyq kommýnıkatsııalar qyzmetinde ótken baspasóz máslıhatynda.

Sol sebepti dáriger ata-analarǵa tumaý juqtyrǵan balany mektepke nemese balabaqshaǵa aparmaýǵa keńes beredi.

«Eger bala bir vırýspen aýyrsa, halyq kóp jınalatyn jerlerde ekinshi bir vırýsty juqtyryp kelýi múmkin. Bul jaǵdaıda balaǵa aýrýdy eńserý qıyn. Eger balanyń tábeti joǵalsa, entigý paıda bolsa, mindetti túrde dárigerge barý kerek», - dedi dáriger ata-analarǵa.

Buǵan deıin QR DSM Sanıtarııalyq-epıdemıologııalyq baqylaý komıteti Juqpaly aýrýlardy epıdemıologııalyq qadaǵalaý basqarmasynyń basshysy Roza Qojapova eldegi epıdemıologııalyq jaǵdaıdy baıandaǵan edi.

Sondaı-aq elimizde balasyna vaktsına salǵyzbaıtyn ata-analar kóbeıýde.