Tumandy Albıondy sý basty

<p><strong>LONDON. KAZINFORM &mdash; </strong>Anglııanyń keıbir aımaqtarynda bir aılyq jaýyn-shashynnyń mólsheri nebári 24 saǵatta jaýyp, keń kólemdi sý tasqynyna alyp keldi, dep habarlaıdy Kazinform tilshisi.</p>

Ásirese, eldiń ortalyq jáne ońtústik aımaqtary qatty zardap shegip otyr. Oksford, Redıng jáne Bat qalalaryndaǵy nóser jańbyrdyń deńgeıi 120 mıllımetrge deıin jetken. Ózender arnasynan shyǵyp, meteorologııalyq qyzmet tótenshe jaǵdaı jarııalady. Mektepter jabylyp, halyq úılerinen kóship jatyr. Kólik qozǵalysy da toqtady.

«Keshe túnde nóser jańbyr jaýyp, ózen kóterile bastady. Úıimiz sý astynda qaldy. Biz osynda 2013 jyly kóship kelgeli mundaı keń kólemdi tabıǵat apaty bolmaǵan», - deıdi Berdforshır graftyǵy turǵyndarynyń biri Kıt Garvýd.

Qorshaǵan ortany qorǵaý agenttigi sý tasqyny týraly 100-ge jýyq eskertý jarııalady. Topan sý Londondaǵy Ýımbldon stadıonyna deıin jetip, shuńqyr paıda boldy. Nátıjesinde Konfederatsııalar kýbogy men basqa da matchtar keıinge qaldyryldy.

Londonnyń órt sóndirý brıgadasy sý tasqynyna baılanysty 350-den astam shaqyrtý alǵanyn habarlady. Qutqarýshylar kólikteri men úılerinde qamalyp qalǵan adamdardy syrtqa alyp shyǵyp jatyr.

Meteorologııalyq bıýro bir-eki kúnde jańbyrdyń toqtaǵanymen aldaǵy ýaqytta onyń jańa qarqynmen qaıta bastalýy múmkin ekenin eskertedi. Soltústikten soqqan salqyn jeldiń áserinen Ulybrıtanııadaǵy aýa temperatýrasy aıtarlyqtaı tómendeıdi degen de aqparat bar.