«Tulpar-Talgonyń» jaıly vagondary jeltoqsannan bastap Astana men Almaty baǵdaryna shyǵa bastaıdy

ASTANA. QazAqparat - 29 qarashada «Tulpar-Talgo» zaýytynda qazaqstandyq óndiristen shyqqan keń shanaqty jolaýshylar vagondaryna Keden odaǵynyń «Temir jol jyljymaly quramynyń qaýipsizdigi týraly» Tehnıkalyq talaby reglamentine sáıkes sertıfıkat saltanatty túrde tabys etildi. Bul týraly «Qazaqstan temir joly» UK» AQ baspasóz qyzmetinen habarlady.

«Asa jaıly vagondar jolaýshylar tasymaly júıesinde jyljymaly quram parkin jańǵyrtýdyń uzaq merzimdi baǵdarlamasy aıasynda shyǵarylyp jatyr», - dep atap ótti «Qazaqstan temir joly» UK» AQ vıtse-prezıdenti Erkin Jýsanbaev.

Jańa úlgidegi vagondar «Tulpar-Talgo» zaýytynyń konstrýktorlyq bıýrosy mamandary men ıspandyq áriptesteriniń Qazaqstandaǵy vagondardy óndiristen shyǵarý tájirıbesi men paıdalaný nátıjesinde birlesken jobasy bolyp tabylady.

Vagondardyń eni, sanıtarlyq-gıgıenalyq bólmesi júrdek poıyz jolaýshylarynyń kirip-shyǵýyna barynsha  qolaıly etilip, keńeıtildi.

Jyljymaly quramda vagonnyń eki túri bar.  «Týrıst» vagondarynda kreslolary jáne  júk qoıatyn orny bar.  «Grand-klass» vagondarynda elektrli kótergishi, múmkindigi shekteýli jandarǵa arnalǵan jeke sebezdetkishimen qosa dárethanasy qamtylǵan.

 «Tulpar-Talgo» vagondary Qazaqstan, Reseı, Germanııa, Avstrııa, Ispanııa, Chehııa, Italııa, Ulybrıtanııa, Frantsııanyń arnaıy ortalyqtarynda synaqtardyń tolyq kezeńderinen ótkizildi.

Máselen, Leıptsıgte vagondardy paıdalaný kezinde bolatyn túrli júkterdi tıeý synaǵy ótkizildi. Madrıdte vagon qoraby arbashasynyń qanshalyqty júkterdi, qansha jyl kóterýge shydas bere alatyndyǵy  synaldy. Venada arnaıy kamerada: ylǵaldy aýada, joǵary qysymdy jáne tómengi temperatýrada, jeldiń jyldamdyǵyna qatysty aýa raıyna shydamdylyǵy jan-jaqty saraptaldy.

Aqmola, Ońtústik Qazaqstan, Jambyl, Qaraǵandy oblystarynda saǵatyna 200 kılometr jyldamdyqpen, qıyn jol telimderinde, keı jerlerinde  300 -den 2000 metrge deıin qıys ketetin tustarda synaldy.

 Temir jol kóligi ǵylymı-zertteý ınstıtýty qyzmetkerleri («TJKǴZI» AQ) 200 kılometrlik jyldamdyqta jyljymaly quramnyń tejegish quraldarynyń sapasy men ózimen-ózi ajyratylýyn basqarý úderisin tekserdi.

«Synaqtar nátıjesi - jyljymaly quramnyń Keden odaǵy «Temir jol jyljymaly quramynyń qaýipsizdigi týraly» TR TS 001/2011 tehnıkalyq reglamenti talabyna saı keletindigin kórsetti. Bul Reseı federaldyq temir jol kóligin sertıfıkattaý  regıstriniń sertıfıkatymen dáıekteldi»,-dep atap ótti «Federaldyq temir jol kóligin sertıfıkattaý regıstri» FBÝ jetekshisiniń birinshi orynbasary A. Karıakın.

Asa jaıly vagondardan jasaqtalǵan jyljymaly quram bıylǵy jeltoqsannan Astana men Almaty baǵdaryna, kelesi jyl basynan Almaty-Shymkent baǵdaryna shyǵa bastaıdy.

Jyljymaly quramdy jańǵyrtý aıasynda 2021 jylǵa deıin «Tulpar-Talgo» jaıly vagondarynan jasaqtalǵan poıyzdardy qosymsha jeti baǵdarǵa - Almaty-Pavlodar, Aqtóbe-Manǵyshlaq, Astana-Lenınogor, Aqtóbe-Atyraý, Almaty-Qostanaı, Astana-Saryaǵash jáne Almaty-Manǵyshlaq baǵytyna jiberý josparlanǵan.