«Tulpar-Talgo» jolserikterin tańdaýda áýe kompanııasynyń talaptary eskeriledi

ASTANA. QazAqparat - Jolaýshylarǵa qyzmet kórsetýdiń ozyq úlgileri boıynsha tájirıbe almasý úshin qazaqstandyq eki kompanııa ózara kelisim jasasty, dep habarlaıdy QazAqparat «Jolaýshylar tasymaly» AQ-nyń baspasóz qyzmetine silteme jasaı otyryp.

«Jolaýshylar tasymaly» AQ ulttyq tasymaldaýshy «Eır Astana» AQ-ymen memorandýmǵa qol qoıdy.

Kompanııanyń baspasóz qyzmetiniń habarlaýynsha, «Jolaýshylar tasymaly» AQ jolaýshylarǵa qyzmet kórsetýdiń jańa deńgeıine kóterildi. Áýe kompanııasy da óz kezeginde jolaýshylarǵa qyzmet kórsetýde kóp tájirıbe jınaǵan jáne qyzmet kórsetýdiń ozyq úlgilerin óndiriske engizgen kásiporyn.

Qazannyń 29-ynda eki kásiporyn «Tulpar-Talgo» poıyzyna jáne áýe kompanııasyna birlesken túrde jolserikterdi jumysqa qabyldady. Ol úsh kezeń boıynsha ótkizildi. Sonyń nátıjesinde 36 jolserik tańdaldy.

2017 qańtardan bastap «Tulpar-Talgo» poıyzyna arnalǵan birlesken baǵdarlama iske qosylady. Áýekompanııasynda bilim trenıngterin eýropalyq sheberler júrgizedi. Onda negizinen, syrtqy kıim úlgisi men keskin kelbet, aralasý etıkasy, sóıleý mádenıeti, klıentke beıimdelý jaılarymen qatar daýly jaǵdaıda mámilege kelý tásilderi úıretiledi.

Onyń syrtynda, poıyzdarda qyzmet kórsetýdiń jetildirilgen jańa standarty túzilip, óndiriske engiziletin bolady.