«Tulpar-Talgo» poıyzdarynyń jolaqy qunyna jeńildikter engizilýde

ASTANA. QazAqparat - 1 tamyzdan bastap «Tulpar-Talgo» zaýytynyń vagondarynan jasaqtalǵan júrdek poıyzdardyń qunyna jeńildikter engizilmek, dep habarlaıdy «Jolaýshylar tasymaly» AQ baspasóz qyzmetinen.

«Jolaýshylar tasymaly» AQ jolaýshylar tasymalyna degen suranysty qanaǵattandyrý jáne júrdek jolaýshylar poıyzdary qyzmetiniń turǵyndarǵa qoljetimdiligin qamtamasyz etý maqsatynda birqatar sharalardy qolǵa alýda. Atap aıtqanda, 2014 jyldyń 1 tamyzynan bastap «Tulpar-Talgo» vagondarynan jasaqtalǵan júrdek poıyzdardyń qunynda tómendegideı jeńildikter qarastyrylmaq:

№49/50 «Almaty-Aqtóbe» poıyzynda: «Grand» (SV) sanatty vagondarda - 25%; «Bıznes» (kýpe) sanatty vagondarda - 15%. №19/20 «Atyraý-Astana», №77/78 «Almaty-Atyraý» poıyzdarynda: «Grand» (SV) sanatty vagondarda - 10%;

Sonymen qatar №49/50 «Almaty-Aqtóbe», №19/20 «Atyraý-Astana», №87/88 «Aqtóbe-Astana» jáne №77/78 «Almaty-Atyraý» jolaýshylar poıyzdarynyń «Grand» jáne «Bıznes» sanatty vagondarynyń quny demalys kúnderi mereke aldy jáne merekelik kúnderden bólek, jumys kúnderi tarıfine deńgeılestirildi, delingen baspasóz habarlamasynda.

«Jolaýshylar tasymaly» AQ málim etýinshe, «Tulpar-Talgo» vagondarynyń «Grand» (SV) sanatynda bes eki oryndyq kýpe bar, olar qosymsha sanıtarlyq jelimen jáne jeke dýsh kabınasymen jabdyqtalǵan. «Bıznes» sanatty vagondarda (jeke sanıtarlyq jelileri joq eki oryndyq) jáne «Grand» vagondarynda jolaýshylardyń yńǵaılylyǵy úshin kreslo jaqtaýlarynda jyljymaly shaǵyn stoldar ornatyldy.