«Tulpar-Talgo» poıyzdarynda qyzmet kórsetý sapasy arta túspek

ASTANA. QazAqparat - Osy jyldyń sáýir aıynan jolaýshylarǵa «Tulpar-Talgo» poıyzdarynda qazirgi zamanǵy talaptarǵa saı sapaly qyzmet kórsetýdi iske asyrýdyń alǵashqy kezeńi bastaldy. Keshendi jospar 2017 jylǵa deıin jalǵasatyn bolady. Bul týraly «QTJ» UK AQ baspasóz qyzmetinen habarlady.

Búginde «Tulpar-Talgo» jolserikterine degen qosymsha biliktilik talaptary qoıylyp otyr. Mysaly, «Bıznes», «Grand» vagondarynyń qyzmet kórsetý personaly joǵary bilimmen qatar qazaq,orys jáne aǵylshyn tilderin bilýge tıis.

Qazir poıyz bastyqtary men jolserikter arnaıy bilim ortalyqtarynda aǵylshyn tilin úırenýde. Budan bólek kásibı jattyqtyrýshy-keńesshiler arnaıy trenıngter ótkizip, onda ózin-ózi ustaý etıkasyna, sóıleý mádenıetine, qyzmet kórsetý standarttaryna, kıkiljińdi jaǵdaılardy sheshý máselelerine basa nazar aýdarmaq.

Jańa biliktilik talaptaryn eskere otyryp, jolserik mamandyǵynyń bedelin arttyrý maqsatynda olardyń jalaqylaryn kezeń-kezeńmen kóterý kózdelip otyr. 2017 jylǵa deıin jolserik jalaqysy ortasha eseppen 50 paıyzǵa deıin kóterilmek.

«Tulpar-Talgo» poıyzdarynyń «Bıznes», «Grand» vagondarynda kezeń-kezeńmen jańa qyzmet túrlerin engizý josparlanyp otyr. Máselen, jolaýshylarǵa 4 túrli mázirden turatyn tegin tamaq usynylatyn bolady.

Sondaı-aq, sapar barysynda poıyzdarda Wi-Fi júıesi - ishki mýltımedııalyq portal uıymdastyrylmaqshy. Portal arqyly jolaýshylar jańalyqtar tyńdap, lıtsenzııalyq fılmder men mýzykalyq baǵdarlamardy t.b. tamashalaı alady.

Sonymen qatar, «Bıznes», «Grand» vagondarynda jolǵa qajetti zattar (tis pastasy, şetkasy, taraq, maılyq, shárke, t.b.) men balalarǵa arnalǵan arnaıy toptamalar qarastyrylǵan. Astana, Almaty jáne oblys ortalyqtarynda jolaýshylardyń tapsyrysy boıynsha aldyn ala taksı shaqyrý qyzmeti de josparlanyp otyr. «Tulpar-Talgo» poıyzdary úshin arnaıy jol sapar jýrnaly shyǵarylmaq

2016-2017 jyldary osyndaı qyzmet kórsetý sapasyn kóterý jumystary basqa da jolaýshylar poıyzdarynda iske asyrý josparlanyp otyr.