Túlkibastyq kásipker beketterdegi qyzmetkerlerge ystyq tamaq jetkizip berdi

TÚLKІBAS. QazAqparat – Túrkistan oblysynyń Túlkibas aýdanynda jeke kásipker arnaıy beketterde turǵan qyzmetkerlerdiń ystyq tamaqpen qamtylýyna jaǵdaı jasady, dep habarlaıdy QazAqparat tilshisi.

Aýdan ákimdiginiń uıymdastyrýymen Ermek Batyrbekov esimdi isker azamat «Shaqpaq» beketindegi táýligine 24 saǵat qyzmet atqaryp júrgen ishki ister men densaýlyq saqtaý salasynyń qyzmetkerlerine túski as jetkizip berdi.

Túlkibastyq kásipker ýaqytpen sanaspaı ári aýa-raıynyń qolaısyzdyǵyna qaramastan jumys jasap jatqan medıtsına qyzmetkerleri men ishki ister salasynyń mamandaryna qoldaý kórsetti. Igi sharaǵa aýdandyq «Jastar resýrstyq ortalyǵynyń» janynan quryǵan «Meıirim» eriktiler tobynyń jastary atsalysyp, taǵamdardy taratyp berdi.

Aıta keteıik, búginde atalǵan aýdan aýmaǵynda eki beket jumys isteýde. Jambyl oblysynan Túlkibas aýdanyna kireberistegi «Shaqpaq» beketinde jáne toǵyz joldyń torabynda oryn tepken Túlkibas vokzalynda jolaýshylardy tekserý sharalary qatań baqylaýǵa alynǵan.

Qazirgi tańda kúre joldyń boıynda ashylǵan arnaıy beketterde 14 polıtsııa, 34 medıtsına qyzmetkerleri táýligine 24 saǵat arnaıy qurylǵymen azamattardyń dene qyzýyn ólshep, tekseristen ótkizýde.

Sońǵy málimetterge sáıkes, Shaqpaq beketinen búginge deıin 21 509 jolaýshy tekserýden ótken. Al, Túlkibas TJ beketi arqyly 783 azamat jiberilip, óńir aýmaǵyna kirgen. Bul baǵyttaǵy sharalar aldaǵy ýaqytty júıeli túrde jalǵasyp, Túlkibas aýdany ákimdiginiń qatań baqylaýynda bolmaq.