Túlkibasta úsh birdeı modýldi medıtsınalyq pýnkt paıdalanýǵa berildi

TÚLKІBAS. QazAqparat – Túrkistan oblysy Túlkibas aýdanynda úsh birdeı modýldi medıtsınalyq pýnkt el ıgiligine berildi. Kókbulaq, Sharafkent jáne Eńbekshi eldi mekenderiniń turǵyndary zaman talabyna saı tirekterde em qabyldaıdy, dep habarlaıdy QazAqparat tilshisi.

Aýyl turǵyndaryna qoljetimdi medıtsınalyq kómek kórsetý maqsatynda aýdanda aýqymdy jumystar júrgizilýde. Endi eldi meken turǵyndary alǵashqy kómekti alysqa barmaı-aq qoljetimdi jerden ala alady.

Jalpy alańy 125 sharshy metr bolatyn pýnkt medıtsınalyq quraldarmen tolyq jabdyqtalǵan. Dárigerlik tekserý, akýsher bólmeleri men ekpe egýge arnalǵan oryn bar. Ǵımarattyń qabyrǵalary zamanaýı qurylys materıaldarynan soǵylǵan. Ystyqqa tózimdi, sýyq ótkizbeıdi. Bastysy, dertine em izdegen turǵyndarǵa barlyq jaǵdaı jasalǵan.

Nebári eki aıdyń ishinde boı kótergen zamanaýı qurastyrmaly-qańqaly medıtsınalyq tirekterdiń quny - 30 mln teńge. Nemis tehnologııasymen jasalǵan bekette feldsher, dáriger - terapevt jáne medbıke qyzmet kórsetedi.

Aıta keteıik, buǵan deıin atalǵan aýdanda Jańatalap, Sarytór eldi mekenderindegi osyndaı tirekter kúrdeli jóndeýden ótken bolatyn.