Túlkibasta saıatshylyq ónerdi nasıhattaıtyn «Salbýryn» festıvali ótti

TÚRKІSTAN. QazAqparat - Túrkistan oblysyndaǵy Túlkibas aýdanynda saıatshylyq ónerdi nasıhattaıtyn «Salbýryn-2019» festıvali bastaldy. Búrkit baptap, tazy júgirtken qazaqtyń tól dástúrin jalǵastyrýǵa arnalǵan festıvalge óńirdiń qala-aýdandaryndaǵy saıatshylar, olardyń 15 búrkit, 16 tazysy qatysyp jatyr, dep habarlaıdy QazAqparat tilshisi.

«Salbýryn - mereke ǵoı saıatshyǵa» atty sharada sondaı-aq, oblystyq tarıhı-ólketaný jáne beıneleý óneri mýzeıleri etnografııalyq kóshpeli kórme uıymdastyrdy. Onda mýzeıler qoryndaǵy atbegi, qusbegi, saıatshylyq, ańshylyq taqyryptaryndaǵy jədigerler men sýretter qoıyldy.

Shara aıasynda búrkit baptaý men qumaı tazylardy ańshylyqqa baýlý, ańǵa salý jaıynda oı-pikirler aıtylyp, is júzinde el aldynda kórsetildi. Ońtústik óńirine belgili qusbegiler óz kásipteriniń qyr-syry týraly áńgimelep, saıatshylyq dástúr týraly tolǵandyrǵan suraqtarǵa jaýap berdi.

Aıta keteıik, Salbýryn - qazaqtyń qysqy merekelik dástúrleriniń biri. Qys maýsymynda ańshylar men saıatshylar toptalyp, birneshe kúnge ań aýlaýǵa shyǵady. Saıatshylyqqa jany qumar qazaqtar úshin qan sonarda ańǵa shyǵý, odan oljaly oralý qysqy mereke retinde tanylǵan.