Túlkibas pen Báıdibek aýdandarynda turmysy tómen otbasylarǵa kómek kórsetilýde

TÚRKІSTAN. QazAqparat – Oblys ákimi Ómirzaq Shókeev ótken aptada barlyq aýdan, qala ákimderi men oblystyq «Nur Otan» partııasy fılıaldaryna «Qamqorlyq» jobasyn iske asyrýdy tapsyrǵan bolatyn. Búginde osy tapsyrmasy aıasynda Túlkibas pen Báıdibek aýdandarynda turmysy tómen otbasylarǵa kómek kórsetilýde, dep habarlaıdy QazAqparat tilshisi.

Túlkibas aýdanynyń aýyldyq okrýg, kent ákimderi turǵyndarmen jeke-jeke jumys júrgizý nátıjesinde jaǵdaıy óte tómen 93 otbasynyń tizimi jasaqtaldy. Aýdan ákimi Nurbol Turashbekov pen aýdandyq máslıhattyń hatshysy S.Seısenbaev, aýdandyq ardagerler jáne qoǵamdyq keńes tóraǵalary ár otbasymen jeke-jeke tanysyp talap-tilekteriniń sheshilý joldaryn qarastyrdy. Búgingi tańda Túlkibas aýdany ákimdiginiń uıytqy bolýymen «Ferrým Konstrakshn» JShS-nyń, «Gramad» gıpermarketiniń jáne «Mádına» makaron fabrıkasynyń demeýshiligimen ázirlengen azyq-túlikter sebetin «Meıirim» eriktiler toby muqtaj otbasylarǵa jetkizýde. Sondaı-aq, baǵdarlama aıasynda eńbekke qaýqarly azamattardy jumyspen qamtý máselesi qarastyrylyp jatyr.

Dál osyndaı júıeli jumys Báıdibek aýdanynda da júrgizilýde. Oblys ákiminiń tapsyrmasyna sáıkes, aýdannyń barlyq aýyldaryndaǵy kómekke muqtaj jandardyń tizimi jasaqtaldy. Muqtaj otbasy múshelerine búginde azy-túlikter jetkizilip, naqty kómek kórsetilýde. Qaıyrymdy iske aýyl ákimderimen birge jergilikti kásipkerler men ár jylǵy aýyl mektebiniń túlekteri jáne jergilikti turǵyndar atsalysýda.