Túlkibas aýdanynda memlekettik qyzmetter jármeńkesi ótti

TÚLKІBAS. QazAqparat – Túrkistan oblysy Túlkibas aýdanynda memlekettik qyzmetterdiń sapasyn arttyrý men olardy elektrondy túrde alýdy halyq arasynda keńinen nasıhattaý maqsatynda arnaıy jármeńke ótti, dep habarlaıdy QazAqparat tilshisi.

QR Prezıdentiniń «Syndarly qoǵamdyq dıalog - Qazaqstannyń turaqtylyǵy men órkendeýiniń negizi» atty halyqqa arnaǵan Joldaýy aıasynda ótkizilgen sharany Qazaqstan respýblıkasy Memlekettik qyzmet isteri agenttiginiń Túrkistan oblysy boıynsha Departamenti men Túlkibas aýdany ákimi apparatynyń aqparattyq qaýipsizdik jáne memlekettik qyzmet kórsetý bólimshesi, aýdandyq halyqqa qyzmet kórsetý ortalyǵy uıymdastyrdy.

Jármeńke barysynda korporatsııa qyzmetkerleri kelýshilerge elektrondy úkimet portalyn paıdalaný jáne portal kómegimen memlekettik qyzmetterge «Azamattarǵa arnalǵan úkimet» bólimderine barmastan onlaın tapsyrys berýdi, sondaı-aq Telegram júıesinde EgovKzBot, Mgov baǵyty boıynsha qyzmet alý joldaryn úıretip, aqparattyq broshıýralar taratty. Jármeńkege qyzyǵa qatysýshylar sany 200-250 ge deıin jetti.

Sonymen qatar, olarǵa onlaın-qyzmet alýdyń joldary úıretilip, ózderine qajetti anyqtamalaryn, elektrondy úkimet portaly týraly kóptegen suraqtaryna utymdy jaýap aldy. Qyzmet alýdyń ońaı ári jyldam túri - @EgovKzBot Telegram-bot messendjerin qoldaný kórsetildi.

Aıta keteıik, aldaǵy ýaqytta osy turǵydaǵy jármeńke aýdandaǵy barlyq aýyldyq okrýgterde ótkiziledi.