Túlkibas aýdanynda kezekte turǵan 30 azamatqa jer telimi berildi

TÚLKІBAS. QazAqparat - Túrkistan oblysy Túlkibas aýdanynda el Táýelsizdiginiń 30 jyldyq mereıtoıyna oraı jer kezeginde turǵan 30 azamatqa jer telimi berildi. Túlkibas kentinde ótken sharaǵa qatysqan aýdan ákimi Nurlan Baıǵut jergilikti halyqty merekemen quttyqtady, dep habarlaıdy QazAqparat tilshisi.

«Tarıh ólshemimen 30 jyl qas-qaǵym sát. Mine, osy az ýaqyttyń ishinde elimiz áleýmettik-ekonomıkalyq damýdyń jarqyn joldarynan ótip, halqymyzdyń turmys deńgeıi artty. Búgingi tańda Táýelsizdiktiń jemisin ózderińiz kórgeli otyrsyzdar. Aýyl sheti ulǵaıyp, ınfraqurylymy tartylǵan daıyn jer telimine qol jetkizip otyrsyzdar»,-dedi aýdan basshysy quttyqtaý sózinde.

Jıyn barysynda on jyldan beri jer kezeginde turyp, úı soǵýǵa qajetti jer telimine qol jetkize almaı júrgen turǵyndar alǵystaryn jetkizdi. Shara barysynda aýdandyq mádenıet úıiniń ónerpazdary kent turǵyndaryna án-shashýlaryn usynyp, merekelik kóńil-kúıge bóledi.

Al, Arys qalasyna qarasty Aqdala aýyldyq okrýginde jańa ákimshilik ǵımaraty paıdalanýǵa berildi. Jańa nysannyń ashylý saltanatyna qatysqa qala ákimi Gúljan Qurmanbekova aldaǵy ýaqytta atalǵan aýyl turǵyndarynyń áleýmettik jaǵdaıy jaqsara túsetinin atap ótti.

«Aýyl kórkine sán qosqan jańa ákimshilik ǵımaraty – aýyldyń bolashaǵyn baıandy, keleshegin kemel etýge septigin tıgizetinine senemin. Ótken jyly «Aýyl – el besigi» baǵdarlamasy aıasynda Aqdala aýyldyq okrýginde 28 kóshege asfalt tóselip, jaryqtandyrý jumystary júrgizildi. Aldaǵy ýaqytta da áleýmettik máselelerdi sheshý arqyly turǵyndardyń ómir súrý sapasyn jaqsartýǵa baǵyttalǵan ıgi jumystar jalǵasyn tabady», – dedi qala basshysy.

Jyly ári sapaly ákimdik ǵımaraty aldaǵy ýaqytta halyq ıgiligi úshin qyzmet kórsetetin bolady. Jıyn sońynda aýyl qarııalary elge qyzmet etip júrgen azamattarǵa aq batasyn berip, jaqsy ister jalǵasyn taba bersin degen izgi tilegin jetkizdi.