Túlkibas aýdanynda bes birdeı mádenı nysan el ıgiligine berildi

TÚLKІBAS. QazAqparat – Túrkistan oblysy Túlkibas aýdanynda kúrdeli jóndeýden ótken bes birdeı mádenıet nysany el ıgiligine berildi. 100-den asa adamǵa eseptelgen mádenı nysandarda jóndeý jumystarymen qatar aýmaǵy tolyǵymen qorshalyp, abattandyrylǵan, dep habarlaıdy QazAqparat tilshisi.

Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda shalǵaı jatqan Kókbulaq, Eltaı, Januzaq, Rysqul, Alǵabas aýyldaryndaǵy klýbtar kúrdeli jóndeýden ótip, esigin aıqara ashty. Jańadan jańǵyrǵan mádenı nysandarda aýyl jastary úshin de mýzykalyq jáne basqa da úıirmeler qarastyrylyp, bos ýaqytyn tıimdi ótkizýge barlyq jaǵdaı jasalǵan.

Aıta keteıik, taýly aýdannyń rýhanııat salasynda atqarylyp jatqan ońdy ister az emes. QR Prezıdenti Qazaqstan halqyna arnaǵan Joldaýynda aýyldy kórkeıtý - basty maqsatymyzdyń biri ekenin aıtqan bolatyn. Osy baǵytta búgingi tańda atalǵan aýdanda júıeli jumystar jolǵa qoıylǵan.