Túlkibas aýdanynda 700-ge tarta turǵynǵa úı salatyn jer telimi beriledi

TÚLKІBAS. QazAqparat – Túrkistan oblysy Túlkibas aýdanynda úı irgelik jer kezeginde turǵan 700-ge tarta turǵynnyń ótinishi qanaǵattandyrylatyn boldy. Aýdan ákimi Nurbol Turashbekovtyń ótken jylǵy esebinde aıtylǵan jergilikti halyqtyń ótinishi osylaı sheshimin tabýda, dep habarlaıdy QazAqparat tilshisi.

Aýdan ákimdiginiń málimetinshe, jyl sanap halyq sany artyp kele jatqan Túlkibas aýdanynda turǵyndar tarapynan kóterilip jatqan árbir másele nazardan tys qalǵan joq. Aýdan basshysy halyqqa jer berý boıynsha qujattardy daıyndaý men basqa da tıisti jumystardy júrgizýdi tapsyrǵan bolatyn.

Oǵan sáıkes bıyldan bastap kezeń-kezeńimen jeke úı qurylysyn júrgizýge jer telimin alý týraly ótinishter qaraldy. Bul jumystar Balyqty aýyly jáne Túlkibas pen Sastóbe kentterinen bastalmaq.

Atap aıtqanda Balyqty aýylynyń turǵyndaryna - 53,8 ga, túlkibastyqtarǵa - 34,6 ga, Sastóbe kentinen - 54,6 ga jer telimi bólinip, onda ınfraqurylym tartylady. Júıeli jumystardyń arqasynda bul eldimekenderde jer kezeginde turǵan 673 azamatqa jer telimi beriledi.

Sonymen qatar bul baǵyttaǵy jumys aldaǵy ýaqytta kezeń-kezenimen iske asady dep josparlanyp otyr.