Túlkibas aýdanyna 7 mlrd teńgeden astam ınvestıtsııa tartylǵan

NUR-SULTAN. QazAqparat - Bıyl Túlkibas aýdanyna tartylǵan ınvestıtsııalar kólemi 7 mlrd 743 mln teńgeni quraǵan. Bul týraly aýdan ákimi Nurlan Baıǵut Túrkistan oblysynyń Óńirlik kommýnıkatsııalar qyzmetinde ótken brıfıngide málimdedi.

Onyń ishinde 2 mlrd 584 mln teńge respýblıkalyq bıýdjet esebinen, 1 mlrd 520 mln teńge jergilikti bıýdjet esebinen, al 3 mlrd 618 mln teńge kásiporyndardan jáne halyqtyń óz qarjysy esebinen tartylǵan.

Aýdanda búgingi tańda 32 kásiporyn jumys isteýde. Osy kásiporyndarmen 10 mlrd 321 mln teńgeniń ónimi óndirilgen. Áleýmettik jumys oryndaryn uıymdastyrý boıynsha aýdan kólemindegi 16 jumys berýshi mekemelerimen kelisim-shart túzilip, 154 azamat joldanǵan.

«Bıyl aýdanda jalpy 54 kóshe tolyǵymen jóndeýden ótip, el ıgiligine paıdalanýǵa berilip otyr. Sonyń ishinde Sastóbe jáne Túlkibas kentindegi 30 kóshe «Aýyl-El besigi» baǵdarlamasy aıasynda jóndelgen. Іshki kóshelerdiń qanaǵattandyrarlyq jaǵdaıy 80 paıyzdan asyp otyr. Sondaı-aq, túngi jaryqtandyrýdy birinshi kezekte qajet etetin 15-ke jýyq kóshege zamanaýı jaryq shamdar ornatyldy. «Qamqorlyq» jobasyna qatysýshy 93 otbasyǵa 215 mln. teńgeden astam qarjyǵa túrli kómekter kórsetildi. Aýdan ákimdiginiń uıytqy bolýymen 21 otbasy baspanaǵa qol jetkizgen. Sonyń ishinde 6 otbasyǵa demeýshilir esebinen turǵyn úı berilse, 15 otbasyǵa memlekettik baǵdarlamamen páter kilti tabystaldy. Sondaı-aq, 9 otbasynyń turǵyn úıi demeýshiler esebinen jóndeýden ótti»,-dedi Nurlan Marhabatuly

Aımaqta mal sharýashylyǵynda aǵymdaǵy jyly 10-15 basqa arnalǵan 76 shaǵyn malbordaqylaý alańdary, 5-10 bastyq 24 januıalyq sút fermasy qurylǵan. Sonymen qatar, Keltemashat aýyldyq okrýginde «Aqbıik Agro» AÓK syıymdylyǵy 600 bas túıetaýyq ósiretin ferma ashylyp, jumys júrgizýde. Alma baǵy sharýashylyǵyn damytýdyń 2021-2025 jyldarǵa arnalǵan damý kontseptsııasyna sáıkes, qosymsha alma baý kólemin 760 gektarǵa ulǵaıtyp, barlyǵy 3355 gektar aýmaqqa jetken. Aǵymdaǵy jyly aýdanda 30 300 tonna jemis-jıdek jınaldy.

Al, týrızm salasyn jandandyrý baǵyty da basty nazarda. Aýdanda 33 týrıstik nysan jumys jasaıdy. Aýdannyń damý baǵdarlamasyna sáıkes, 2020 jyly aýdanǵa jalpy 19 500 týrıst keledi dep josparlansa, búgingi tańda 2017 týrıst kelgen. Dúnıe júzin alańdatqan COVID-19 indetiniń taralýyna tosqaýyl qoıý maqsatynda, oryn alyp jatqan karantındik shekteýlerge baılanysty jospar 40 paıyzǵa oryndalady dep kútilýde.