Túlekter keshi ótetin kezde spırtti ishimdik satýǵa tyıym salý usynyldy

PETROPAVL. QazAqparat - Petropavlda alǵash ret SQO ІІD basshylyǵynyń úkimettik emes jáne qoǵamdyq uıym ókilderimen kezdesýi ótti, dep habarlaıdy «QazAqparat» HAA tilshisi ІІD-niń baspasóz qyzmetine silteme jasap.

«Dóńgelek ústelde» taraptar jergilikti polıtsııa men ákimshilik qyzmetter jumystarynyń qorytyndylaryn, sondaı-aq qoǵamdyq uıymdardyń usynystaryn talqylady. Atap aıtqanda, turǵyn úı-kommýnaldyq qyzmet jáne jol qozǵalysyn jaqsartýǵa qatysty máseleler qozǵaldy. Kóshikov jáne Batyr Baıan kósheleriniń qıylysyna jaıaý júrginshilerge arnalǵan baǵdarsham ornatý, Peterfeld eldi mekenindegi jaryq júıesin jetildirý, Pestryı kóliniń aınalasyndaǵy úılerge baratyn joldyń bolmaýy syndy túıitkilder basty nazarda boldy.

«Aýyl» HDPP SQO fılıalynyń tóraǵasy Ivan Kendıýh polıtseıler men zeınetkerlerdi ǵylym salasynda batyldaý qadamdar jasap kórýge shaqyrdy.    Ekonomıka ǵylymdarynyń doktorynyń atap ótýinshe, zańgerlik mol bilimi men tájirıbesi bar zeınettegi jáne qyzmet ústindegi ofıtserlerdiń ǵylymmen aınalysýyna úlken áleýet bar.  

«QKHP oblystyq komıtetiniń birinshi hatshysy Sergeı Martemıanov mektepterde sońǵy qońyraý jáne túlekter keshteri ótetin kezde spırtti ishimdikterdiń satylýyna moratorıı engizýdi usyndy», - deıdi baspasóz qyzmetindegiler.

Polıtsııa keńsesiniń basshysy Berik Bilálov aıtylǵan usynystardyń barlyǵyn zerdelep, olardy sheshý múmkindikterin qarastyrýǵa ýáde berdi.