TÚQJB úlestik qurylys nysandaryn kepilsiz nesıeleýge kirisedi

ASTANA. QazAqparat - Bas josparlar boıynsha Astana men Almaty qalalary aýmaǵynda jeke turǵyn úıge on sotyqtan jer telimderi bólinbeıdi. Bul týraly «Nurly jer» baǵdarlamasyn júzege asyrý barysyna arnalǵan Úkimettegi baspasóz máslıhatynda «Turǵyn úı qurylys jınaq banki» AQ basqarma tóraıymy Lázzat Ibragımova málim etti, dep habarlaıdy QazAqparat.

«Ózderińiz bilesizder, Qazaqstanda «Báıterek» holdınginiń enshiles uıymy Turǵyn úı qurylysyna kepildik berý qory jumys isteýde. Ol qurylysty aıaqtaý táýekelderine kepildik berýge jáne azamattarǵa úlestik qurylysqa qatysýǵa múmkindik jasaý úshin quryldy. Bul baǵyttaǵy sharalar órkenıetti jolmen iske asyrylady. Osy oraıda jaqsy jańalyqty habarlaǵym keledi, endi alǵashqy jobany, ıaǵnı birinshi qyrkúıekten bastap «Astana Mıllenıým Park» kesheni boıynsha sharshy metrine 290 myń teńgeden salymshylarǵa baspanany ótkizemiz»,-dedi L. Ibragımova.

Bul turǵyda ol úlestik qatysýǵa nesıeler kepil múliksiz beriletinin atap ótti.

«Olarǵa nesıelik jelini ashyp, nesıelerdi kepil múliksiz beremiz. ıAǵnı kepil múlik retinde úlestik qatysýdyń kelisimsharty bolady. Sebebi «Bazıs» kompanııasynyń atalǵan nysany Turǵyn úı qurylysyna kepildik berý qorymen kepildendirilgen. Bul «Nurly jer» memlekettik baǵdarlamasynyń quramdas bóligi bolyp tabylady. Sondyqtan osy baǵytta baspana alýǵa nıettilerdiń barlyǵyn shaqyramyz»,-dedi Lázzat Ibragımova.