Tuqym sharýashylyǵyn damytýdyń jeke strategııasy ázirlenbek

NUR-SULTAN. QazAqparat – Aýyl sharýashylyǵy mınıstrligi elimizde tuqym sharýashylyǵyn damytýdyń jospary jaıynda túsinik berdi, dep habarlaıdy QazAqparat tilshisi.

«Qazaqstandy otandyq selektsııanyń aýyl sharýashylyǵy daqyldarynyń tuqymdarymen qamtamasyz etýdiń jáne biryńǵaı tizbekte «selektsııa-tuqym sharýashylyǵy-óndiris» biriktiriletin tuqym sharýashylyǵynyń ǵylymı-óndiristik ortalyǵyn qurýdy, sondaı-aq barlyq deńgeılerde tuqym sharýashylyǵyn júrgizýdiń materıaldyq-tehnıkalyq bazasyn jaqsartýdy kózdeıtin jeke strategııasyn ázirleý josparlanyp otyr. Bul turǵyda ımportqa táýeldilikti azaıtýǵa erekshe mán berilgen», - delingen mınıstrliktiń QazAqparat agenttigine bergen jaýabynda.

Budan basqa, kelesi jyldan bastap damyǵan elderdiń tájirıbesi boıynsha tsıfrlyq formatta orıgınatorlardan bastap taýar sharýashylyqtaryna deıin joǵary reprodýktsııaly tuqymdardyń jyljýyn qadaǵalaýǵa múmkindik beretin jańa aqparattyq júıe engiziletin bolady. Bul olardyń paıdalanylýyna qatań baqylaý ornatýǵa múmkindik beredi.

«Sonymen qatar tuqym sharýashylyǵyn qoldaý boıynsha arnaıy bıýdjettik baǵdarlama jumys isteıdi, ol tuqym sharýashylyǵynyń barlyq kezeńderin qamtıdy. Elıtaly tuqym ósirý jáne tuqym ósirý sharýashylyqtaryna tuqym óndirý úshin biregeı ári elıtaly tuqym satyp alý quny (70%) arzandatylady», - dep atalyp ótken vedomstvo málimetinde.

Budan buryn habarlanǵandaı, bıyl Úkimettiń keńeıtilgen otyrysynda Prezıdent aýyl sharýashylyǵy daqyldarynyń tuqymyn elimizde qamtamasyz etýge, sondaı-aq olardyń sapasyna qatysty erekshe toqtaldy.

Tuqym sharýashylyǵyn qoldaýǵa bıyl jergilikti bıýdjetterde 11,8 mlrd teńge qarastyrylǵan.