Túkirgeni úshin elordalyqtarǵa 19 mln teńge aıyppul salyndy

ASTANA. QazAqparat – Jyl basynan beri qoǵamdyq oryndarda túkirgen astanalyqtarǵa 19 mln teńge aıyppul salyndy. Bul týraly BAQ ókilderiniń qatysýymen ótken brıfıngide Astana qalalyq PD Jergilikti polıtsııa qyzmeti basqarmasynyń basshysy Arman Aıtmaǵambetov málim etti, dep habarlaıdy QazAqparat tilshisi.

«Jalpyǵa ortaq paıdalanylatyn oryndardyń lastanýyna baılanysty quqyq buzýshylyqtardyń jolyn kesý boıynsha jumys júrgizip kelemiz. Ásirese, qoǵamdyq oryndarda jáne kóshelerde túkirip jatqan azamattarǵa nazar aýdarylady. Jyl basynan beri túkirgeni úshin 1 200 azamatqa 19 mln teńge aıyppul salyndy. Búginde onyń 5 mln teńgesi nemese 28% óndirildi», - dedi Arman Aıtmaǵambetov BAQ ókilderiniń saýalyna jaýap bere otyryp.

Spıkerdiń aıtýynsha, túkirý faktileri elordadaǵy bazarlardyń mańaıynda jıi tirkeledi. Arman Aıtmaǵambetov olardyń barlyǵy beınekameralardyń kómegimen anyqtalyp jatqanyn málim etti.

Aıta keteıik, búginde Astana qalasynyń aýmaǵynda 14 myńnan astam kamera bar. Aldaǵy ýaqytta olardyń sanyn ulǵaıtý josparlanyp otyr.

Qosa ketsek, byltyr jeltoqsan aıynda otandyq telearnalardyń birine suhbat berip turyp, jerge túkirgen Májilis depýtaty Erlan Saırov aıyppul tólegen edi.