Tuqymy sýǵa ketken aqtóbelik dıqannyń máselesi qalaı sheshildi

<p>AQTÓBE. KAZINFORM &ndash; Aqtóbe oblysy Qumqudyq aýylynda kóktemgi sý tasqyny kezinde sharýa qojalyǵynyń 80 tonna tuqymy jaramsyz bolyp qaldy. Sharýalar arasynda ózara tuqym aıyrbastaý júrip, &laquo;Álı&raquo; óndiristik kooperatıvi 400 ga jerge bıdaı ekti.&nbsp;</p>

Aqtóbe oblysy boıynsha bıyl 700 myń gektardan astam aýmaq ıgeriledi. Qazirgi kezde 220 myń gektar aýmaqta kóktemgi dalalyq jumystary júrgizildi. 

- Sý tasqyny kezinde ósimdik sharýashylyǵyna aıtarlyqtaı zııan kelmedi. Qazir egis alqaptarynyń bári jaramdy, egin egý jumysy júrip jatyr. Sáýir aıynyń sońǵy onkúndigi men mamyr aıynyń basynan bastap 220 myń gektarǵa egis jumystary júrdi. Onyń ishinde 160 myń gektary dándi daqyldar, 32 myń gektary maıly daqyldar, 30 myń gektary mal azyǵy jáne 1,4 myń ga kartop, 500 ga kókónis, qalǵan 200 ga baqsha daqyldary. Aıta keterligi, Áıteke bı aýdany Qumqudyq aýyly «Álı» óndiristik kooperatıvinde tuqymdy sý basty. Ákimdik tarapynan shyǵyndy óteý joly qarastyrylyp jatyr. Búginde sharýashylyq sharýalar arasyndaǵy ózara tuqym aıyrbastaý tásilimen tuqym alyp, egis jumysyn júrgizdi. Qazir 400 gektar alqapqa bıdaı ekti. Elimizde aýyl sharýashylyǵy salasynda jeke jáne zańdy tulǵalarǵa shyǵyndy óteý qaǵıdalary bekitildi. Ol jerde egistik alqaptardyń sýǵa ketýi qarastyrylyp otyr. Bizde egistik alqap emes, tuqym bolyp tur. Áli de mınıstrlik arqyly naqtylaý kerek, - dedi Aqtóbe oblystyq aýyl sharýashylyǵy jáne jer qatynastary basqarmasy bóliminiń basshysy Nurbek Raıymbaev.

Onyń aıtýynsha, bıyl jalpy 400-430 myń tonna astyq, 40 myń tonna maıly daqyl jınalady dep boljandy. Ortasha ónimdiligi gektaryna 10 tsentner bolýy múmkin. 

Aıta keteıik, kóktemgi sý tasqyny kezinde Aqtóbede 3 myńnan astam mal óleksesi tirkeldi. Barlyǵy 1500-den astam mal basyna 264,4 mln teńge óteldi.