«Týǵan jer»: Túrkistanda 97 nysan iske qosyldy
Elbasymyz «Bolashaqqa baǵdar: rýhanı jańǵyrý» atty baǵdarlamalyq maqalasynda «Týǵan jer» arnaıy jobasyn usynǵan bolatyn. Búginde osy joba aıasynda Túrkistan oblysynda birqatar jumystar atqaryldy.
Qýanarlyǵy, «Týǵan jer» baǵdarlamasyna kásipkerlerdiń yqylasy artý ústinde. Memleket basshysynyń «Týǵan jerge, onyń mádenıeti men salt-dástúrlerine aıryqsha ińkárlikpen atsalysý - shynaıy patrıotızmniń mańyzdy kórinisteriniń biri» degen ustanymyn úlgi tutqan kásipkerler men el azamattary túrli nysandardyń qurylysyna demeýshilik jasap, týǵan óńirdi gúldendirýge belsene kirisip ketti.
Naqtyraq aıtsaq, bıyl Túrkistan oblysynda «Týǵan jer» arnaıy jobasy boıynsha demeýshilerdiń kómegimen 97 nysan iske qosyldy. Aıaqtalǵan 97 nysannyń 28-i bilim mekemeleriniń qurylysy bolsa, 3 ǵımarat qaıta jóndeýden ótkizilgen.
Sonymen birge, 2-i medıtsına mekemesi, 12 sport nysany ashylsa, 2 sport alańy jóndeldi. 15 mádenıet nysany paıdalanýǵa berilip, men 5 qaıta jóndeýden ótkizilse, abattandyrý boıynsha 30 joba iske asyrylǵan.
Jomart kásipkerlerdiń demeýshiligimen nysandar el ıgiligine qyzmet etip jatyr.
Máselen, Otyrar aýdanynda quny 248 mln teńgeni quraıtyn sport kesheni men boks zaly sportsúıer jastarǵa esigin aıqara ashty. Al, Báıdibek aýdanynda 14,3 shaqyrym jolǵa «Aqyldy sham» jelisi ornatylǵan. Bul ıgi iske demeýshi kásipker quny 195 mln. teńge jumsaǵan. Qazyǵurt aýdanyndaǵy quny 100 mln teńge quraıtyn Salqam Jáńgir han men Jalańtós bahadúrge arnalǵan memorıaldyq kesheni, Kentaý qalasyndaǵy quny 80 mln. teńgeni jáne Saryǵash aýdanyndaǵy quny 50 mln teńge quraıtyn sport keshenderi de elge qyzmet etýde. Tólebı aýdanynda ashylǵan «KazMed» medıtsınalyq ortalyǵy, Saıram aýdanynda 125 oryndyq balabaqsha jáne ózge de áleýmettik nysandar týǵan jerin súıetin kásipkerlerdiń kómegimen salynǵan.
Metsenattardyń eńbegin qoldaý maqsatynda 2018 jylǵy shilde-qazan aılarynda 16 aýdan, qalada «Jomart júrek» syılyǵynyń 1-kezeńi ótkizilip, oblystyq deńgeıdegi qorytyndy jıynda 20 azamat marapattalǵan.