Týǵan jer: OQO-da 577 joba qolǵa alyndy
Ákimniń aıtýynsha, ońtústik óńiri agrarlyq aımaq bolǵandyqtan bul salaǵa jańa tehnologııalar engizý boıynsha jumystar júıeli túrde atqarylyp otyr. Búgingi tańda óńirdegi agrarlyq sektordy ıgerý jáne ınnovatsııalardy engizý eń mańyzdy máselelerdiń birine aınalýda. Osy jaıttarǵa toqtalǵan oblys ákimi aldaǵy ýaqytta ıntensıvti baq, tamshylatyp sýǵarý, jylyjaı kólemin ulǵaıtý baǵyttarynda jańa tehnologııalar engizý arqyly ónimdilikti artyrýǵa bolatynyn atap ótti.
«Qazirgi tańda BAÁ men Iran memleketterine qoı etin eksporttaý boıynsha aldyn-ala kelisimder jasalyp otyr. Jalpy 2021 jylǵa aýyl sharýashylyǵy taýarlary eksportyn kem degende 3 esege arttyrýymyz qajet. QR Aýyl sharýashylyǵy, Eńbek jáne áleýmettik qorǵaý mınıstrlikteri, Ońtústik Qazaqstan oblysy ákimdigi arasynda túzilgen úshjaqty is-sharalar josparynda bekitilgen 75 ındıkatorlyq kórsetkish 158 birlikke nemese 2,1 esege oryndaldy. Bıylǵy jyly 3000-nan kem emes úı sharýashylyqtarynan biriktirilgen 102 kooperatıv quratyn bolamyz», - dedi Janseıit Qanseıituly.
Budan bólek, oblys boıynsha 457 myń gektar sýarmaly jerlerdi aǵyn sýmen jalpy uzyndyǵy 14 myń shaqyrymdy quraıtyn 2325 kanal qamtamasyz etedi. Onyń 9 myń shaqyrymy kommýnaldyq menshiktegi 1105 kanaldyń 4,6 myń shaqyrymy jóndeýdi qajet etedi. Úsh jyl ishinde jóndeýdi qajet etetin sý sharýashylyǵy qurylystarynyń 50 paıyzy qalpyna keltiriledi.
Ákim sonymen qatar, elimiz úshin mańyzdy sanalatyn Batys Eýropa - Batys Qytaı tranzıttik jolyna erekshe toqtalyp ketti.
«Intellektýaldy kólik júıesin engizý maqsatynda Shymkent qalasy boıynsha «Smart Sıtı» jobasy sheńberinde qalaǵa kire beris jeti jerden aýyr salmaqty júk kólikterin qadaǵalaý úshin arnaıy tarazy men arka qurý josparda bar. Óńirde sondaı-aq memlekettik qoldaýdyń arqasynda turǵyn úı qurylysynyń kólemi de jyl saıyn artyp keledi. 2017 jyldyń basynan «Nurly jer» turǵyn úı qurylysy baǵdarlamasy aıasynda 721,149 myń sharshy metrdi quraıtyn jalpy sany 7500-ge jýyq páter berilgen. Elbasy aıtqan Qazaqstannyń kıeli oryndarynyń kartasyna Ońtústik Qazaqstan oblysynan 35 nysan qosyldy. «Týǵan jer» baǵdarlamasynyń aıasynda jalpy quny 31,5 mlrd teńgeni quraıtyn 577 joba qolǵa alynǵan»,- dep atap ótti aımaq basshysy.
Oblys ákimi ońtústikqazaqstandyqtardy Elbasy bastamalaryn qoldap, Joldaýynda atap kórsetilgen máselelerdi iske asyrýǵa belsendi qatysyp, oblystyń áleýmettik-ekonomıkalyq damýy men saıası turaqtylyqty qamtamasyz etýge bar kúsh-qaıratty jumsaýǵa shaqyrdy.