Týǵan qyzyn zorlaǵan Aqmola turǵyny 16 jylǵa sottaldy
Aqmola oblysynyń qylmystyq ister jónindegi mamandandyrylǵan aýdanaralyq soty týǵan qyzyn birneshe ret zorlady dep aıyptalǵan Kókshetaýdyń 43 jastaǵy turǵynyna qatysty úkim shyǵardy. Qylmys jasaǵan kezde qyz 17 jasta edi.
Alǵash ret ákesi jasóspirimdi 2020 jyldyń tamyzynda qorlaǵan: týystarynan qaıtyp kele jatyp, er adam kóliktiń salonynda óziniń aram oıyn iske asyrǵan. Qoryqqan qyz bul oqıǵa týraly anasyna aıtpaǵan. Uıalǵan. Al jazasyz qalǵan ákesi keıinnen óziniń sumdyq áreketterin taǵy eki ret qaıtalaǵan.
Úsh aıdan keıin, qarasha aıynda qyz anasyna oqıǵa týraly aıtqan, al ol polıtsııaǵa habarlaǵan. Tergeýshiler dereý QR QK-niń 120-baby 3-bóligi (Zorlaý) boıynsha sotqa deıingi is qozǵady.
Tergeý aıasynda quqyq qorǵaý organdary jábirlenýshi men kúdiktiniń aıǵaqtaryn muqııat zerttep, tekserdi. Sot-medıtsınalyq jáne sot-psıhologııalyq-psıhıatrııalyq saraptamalar júrgizdi, oqıǵa ornynda qyzdyń aıǵaqtaryn tekserý jáne naqtylaý júrgizildi. Bul rette sot otyrysy barysynda sottalýshy óz kinásin jartylaı moıyndady, alaıda tergeýshiler jınaǵan dáleldemeler onyń sumdyq qylmys jasaǵanyn tolyq dáleldedi.
Sottalýshynyń qylmystyq jaýaptylyǵy men jazasyn jeńildetetin mán-jaılardy sot qarastyrǵan joq.
Sottyń úkimimen aqmolalyqqa 16 jyl merzimge bas bostandyǵynan aıyrý túrindegi jaza taǵaıyndaldy. Ómir boıy pedagogıkalyq laýazymdar men kámeletke tolmaǵandarmen jumys isteýmen baılanysty laýazymdardy atqarýǵa tyıym salyndy.
Sondaı-aq qyzdyń paıdasyna 3 mln teńge kóleminde moraldyq zııan ótemaqysyn óndirip alý týraly sheshim qabyldandy.
Qazirgi ýaqytta er adam bas bostandyǵynan aıyrý oryndarynda jazasyn ótep jatyr.