«Týǵan elge taǵzym» ekspedıtsııasy Batys Qazaqstannyń tarıhı oryndarymen tanysty

 ORAL. QazAqparat - Quramynda Qaraǵandy jáne Qostanaı qalalaryndaǵy Nazarbaev zııatkerlik mektepteriniń shákirtteri bar «Týǵan elge taǵzym» ólketaný-zertteý ekspedıtsııasy Batys Qazaqstan oblysyna kelip, óńirdiń tarıhı oryndarymen tanysýda. Búgin ekspedıtsııa Syrym aýdany ortalyǵy Jympıty aýylyndaǵy Syrym Datuly atyndaǵy tarıhı-ólketaný mýzeıi men Alashorda mýzeıinde bolyp, tanymdyq-zertteý jumystaryn júrgizdi, dep habarlaıdy «QazAqparat» tilshisi.

Oral qalasyndaǵy fızıka-matematıka baǵytyndaǵy Nazarbaev zııatkerlik mektebiniń baspasóz hatshysy Aqmonshaq Jumaevanyń aıtýynsha, Elbasynyń «Rýhanı jańǵyrý» baǵdarlamasynyń maqsat-mindetterimen tolyq úndesetin «Týǵan elge taǵzym» atty dástúrli joba «Nazarbaev zııatkerlik mektepteri» derbes bilim berý uıymy arqyly Qazaqstannyń qalalaryna ekspedıtsııa túrinde uıymdastyrylyp keledi. Mysaly, qaraǵandylyq jáne qostanaılyq shákirtter Batys Qazaqstan oblysyna kelse, oraldyq oqýshylar Qaraǵandy óńirine saparlap ketti. Ekspedıtsııa quramyna oqý jyly úzdik nátıje kórsetken shákirtter alynady. Bul joba maqsaty - belgili bir aımaqty taný, zertteý. Bıyl Alashorda úkimetiniń 100 jyldyǵy basty taqyryp retinde alynyp otyr. Sondyqtan jas zııatkerler ótken ǵasyrdyń basynda Alashorda úkimetiniń Batys bólimshesi tý tigip, irge kótergen jeri - Jympıtyǵa at basyn tiredi.

 

Nazarbaev zııatkerlik mektepteriniń oqýshylary aýdan basshysy Abat Shynybekovpen jáne tarıh ǵylymdarynyń kandıdaty, alashtanýshy Dámetken Súleımenovamen kezdesip, áńgimelesti. Júzdesý barysynda aýdan ákimi óńirdiń arǵy-bergi tarıhyna toqtalyp, onda Syrym Datuly, Taılaq batyr, Alashordanyń kórnekti qaıratkeri Jahansha Dosmuhamedov, aqyndar Abdolla Jumaǵalıev, Qadyr Myrza Álı, sýretshi Muratbek Jolamanov syndy birtýar tulǵalardyń dúnıege kelgendigin aıtyp ótti. Jympıty - Semeı baǵytyndaǵy «Alash jolymen...» tarıhı-tanymdyq ekspedıtsııasynyń jumysy da sóz boldy.

 

Jas zııatkerler ekspedıtsııa qorytyndysy boıynsha ǵylymı maqala, esse jazady. Osyǵan oraı Abat Shynybekov olardyń Syrym aýdanyna qatysty eńbekteri boıynsha aýdan ákimdigi atynan baıqaý uıymdastyrý jóninde usynys bildirip, bul bastamany atalmysh mektepter ustazdary qoldady. Kelgen qonaqtardyń barlyǵyna Syrym aýdany ákimdiginiń qoldaýymen jaryq kórgen «Abdolla» atty kitap pen aýdandyq balalar men jasóspirimder shyǵarmashylyǵy ortalyǵynyń shákirtteri jasaǵan kádesyılar berildi.

Ekspedıtsııa músheleri erteń Oral qalasyndaǵy mýzeıler jáne óndiris oryndarymen tanysady.