Týǵan elge saıahat: 600 bala Qazaqstannyń jeti aımaǵyn poıyzben aralap shyǵady

ASTANA. QazAqparat - Qazaqstannyń 7 týrıstik aımaǵyn aralaıtyn «Týǵan elge saıahat» balalar patrıottyq-tanymdyq poıyzyna 600 bala joldama alady. Onyń ishinde 300 qatysýshy «Óz óńirimdi órkendetkim keledi» degen taqyrypta esse jazý arqyly anyqtalady, dep habarlaıdy QazAqparat.

Oǵan 10-15 jas aralyǵyndaǵy balalar qatysady. Olar atalǵan taqyryptaǵy týyndysyn [e-mail] elektrondy poshtasyna 10 maýsymǵa deıin joldaýy qajet.

​Shyǵarmalar qazaq nemese orys tilinde qabyldanady. Bir bala bir shyǵarma ǵana joldaýǵa tıis.

Jol ústindegi jazǵy demalysqa joldama alatyn balalardy qazylar alqasy anyqtaıdy.

Al 300 joldama «Samuryq-Qazyna» AQ kompanııalar tobyndaǵy óndiristik kásiporyndarda jumys isteıtin qyzmetkerlerdiń balalaryna beriledi.

Týǵan elge saıahat 3 kezeńnen turady:

Alǵashqy kezeńde maýsym aıynyń 20-sy kúni Astanadan shyqqan poıyz Baıqońyr, Túrkistan, Almaty jáne Býrabaıǵa baryp, 28 maýsymda elordaǵa qaıtyp keledi.

Ekinshi kezeń 2-11 shilde aralyǵynda Astana – Baıqońyr – Túrkistan – Almaty – Alakól – Astana baǵytyn qamıtıdy.

Al úshinshi kezeńniń qatysýshylary 19-30 shilde aralyǵynda Astanadan Almatyǵa, sodan soń Túrkistan men Baıqońyrǵa baryp, Aqtaý arqyly Astanaǵa oralady.

​Joba «Samuryq-Qazyna» AQ kompanııalar tobynyń atynan «Samruk-Kazyna Trust» áleýmettik jobalardy damytý qorynyń qarjylyq qoldaýymen, QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń jáne «Áleýmettik jobalar qorynyń» qatysýymen júzege asyp jatyr.

Prezıdent teleradıokesheni atynan «Jibek Joly» telearnasy yntymaqtastyq týraly memorandým aıasynda bas aqparattyq seriktes bolyp otyr.

Tolyq aqparatty 8 (7172) 604 599, 8 (775) 142 66 82 baılanys nómirlerine habarlasyp bilýge bolady.