Týǵan elge degen qurmet rámizderdi qadirleýden bastalady – Memlekettik hatshy
Jıyn barysynda QR Mádenıet jáne sport vıtse-mınıstri Nurǵısa Dáýeshev Qazaqstan QR Memlekettik hatshysy Erlan Qarınniń quttyqtaý hatyn oqyp berdi.
«Bıyl memleketimizdiń mártebeli sımvoly – memlekettik rámizderdiń qabyldanǵanyna 30 jyl. Otandy qasterleý, týǵan elge degen shynaıy qurmet memlekettik rámizderdi qadirleýden bastalady. Memlekettik rámizder – eldiktiń, egemendiktiń basty nyshany, ulttyq rýh pen qoǵamdyq kelsimniń, sondaı-aq patrıottyq tárbıeniń asa mańyzdy quraly. Kók baıraǵymyz kókte jelbirep, Eltańbamyz el tórinde nyq turyp, Ánuranymyz aspanda qalyqtasa, ol memleket mereıi ústem, mártebesi bıik ekenin, halqymyzdyń birlik pen berekede ómir súrip jatqanyn aıǵaqtaıdy», - degen E. Qarın quttyqtaý hatynda.
Osy oraıda Memlekettik hatshynyń quttyqtaý hatynda ǵalymdar tarapynan memlekettik rámizderdi tıimdi nasıhattaýǵa jáne patrıottyq tárbıeniń tyń tásilderin jetildirýge qatysty irgeli zertteýler usynylýy kerek ekeni aıtylǵan.
«Búgin ótip jatqan «Memlekettiliktiń rámizderi» halyqaralyq ǵylymı konferentsııasy osy iske eleýli úles qosady dep senemiz», - dedi Erlan Qarın.
Osydan týra 30 jyl buryn, naqty aıtqanda 1992 jyldyń 4 maýsymynda QR Tuńǵysh Prezıdenti Nursultan Nazarbaev «Qazaqstan Respýblıkasynyń Memlekettik týy týraly», «Qazaqstan Respýblıkasynyń Memlekettik eltańbasy týraly» jáne «Qazaqstan Respýblıkasy Memlekettik ánuranynyń mýzykalyq redaktsııasy týraly» Zańdarǵa qol qoıǵan edi.
Al «Qazaqstan Respýblıkasynyń Memlekettik rámizderi týraly» Konstıtýtsııalyq Zań 2007 jyly 4 maýsymda qabyldandy. Osy Zańǵa sáıkes jyl saıyn 4 maýsym Qazaqstan Respýblıkasynda Memlekettik rámizder kúni retinde merekelenedi. Memlekettik rámizder – bul kez kelgen memlekettiń egemendigi men birtutastyǵyn beıneleıtin, onyń ajyraǵysyz atrıbýttarynyń biri.