Tsıfrlyq damý mınıstrligi qazaqstandyqtardyń jeke málimeti ruqsatsyz taralǵanyn rastady
«Osy joly JSN, turǵylyqty jeri, aty-jóni sheteldik Telegram-botynda ashyq túrde kórinip turǵany aıtylyp jatty. Tek telefon nómirin engizý kerek boldy. Bul turǵyda adamdar osy málimetter memlekettik aqparattyq júıelerden alynýy múmkin dep oılap júr. Bul qalaı múmkin boldy jáne mınıstrlik jaǵdaıdy túzetý úshin ne istedi? Búgin Májiliste qaralyp jatqan zań jobasy aıtylǵan máseleni sheshe me?», - dedi N.Shatalov.
Tsıfrlyq damý, ınnovatsııalar jáne aeroǵarysh ónerkásibi vıtse-mınıstri Málik Oljabekov shynymen de keıbir Telegram-bottarda jeke málimetterdiń taralý oqıǵasy bolǵanyn rastady.
«Olardyń jumys prıntsıpine toqtalsaq, atalǵan júıe aqparatty ártúrli kózderden, sonyń ishinde áleýmettik jelilerden jáne uıaly telefon nómirin engizý negizinde jınap, derekterdi ózara biriktirip otyrady. Bizdiń oıymyzsha, bul málimetterdi Qazaqstanda tyıym salynǵan servıs jarııalaýy múmkin. Bul servıs telefon nómiri arqyly derekterdi shyǵaryp beredi. Tıisti adresterge toqtalsaq, olar negizinen budan buryn jarııalanǵan eski derekter. Sonymen qatar, bul aqparat jalpyǵa birdeı taralǵan servısterden alynýy yqtımal, ıaǵnı taǵam nemese túrli taýarlar jetkizetin qyzmet kórsetý nysandarynan jınaqtaýy múmkin», - dedi vıtse-mınıstr.
Osy oraıda Málik Oljabekov Mádenıet jáne aqparat mınıstrligine osy qyzmetterdi buǵattaý týraly tıisti ótinim joldanǵanyn aıtty. Sondaı-aq osy derekkóz ıelerine qatysty tekserý júrgizý úshin taralǵan aqparatty zertteý jalǵasyp jatyr.
Munymen qosa, Májilis depýtaty Ekaterına Smyshlıaeva búgin palatanyń jalpy otyrysynda birinshi oqylymda maquldanǵan «Qazaqstan Respýblıkasynyń keıbir zańnamalyq aktilerine aqparattyq qaýipsizdik máseleleri boıynsha ózgerister men tolyqtyrýlar engizý týraly» zań jobasy derekterdi qorǵaý máselesin qarastyratynyn, bul jeke derekterge qatysty túzetýlerdiń úshinshi paketi ekenin aıtty.
«Eń bastysy, biz jeke derekter salasyndaǵy memlekettik baqylaýdy kúsheıtemiz», - dedi depýtat.