Treıderler men ınvestorlar alańdaýly - sarapshy Izraıl men Palestına qaqtyǵysy jaıly

<p>Munaı-gaz salasynyń sarapshysy, energetıka mınıstriniń eks-keńesshisi Oljas Baıdildınov Izraıl men Palestına arasyndaǵy ahýaldyń Qazaqstan men álemdik &laquo;qara altyn&raquo; naryǵyna qalaı áser etetinine qatysty pikir bildirdi, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

«Bul jaǵdaıdyń munaı naryǵyna tıgizer teris áseri joq. Óıtkeni, eki el de (Izraıl men Palestına – avt.) iri óndirýshi nemese tutynýshy sanalmaıdy. Alaıda, treıderler men ınvestorlar alańdaýly, olar úshin táýekeldi máseleler bar, ıaǵnı Ormýz buǵazy (Parsy shyǵanaǵynan AQSh, Japonııa jáne Batys Eýropaǵa munaı tasymaldaıtyn jalǵyz teńiz joly) arqyly ótýge tyıym salý yqtımaldyǵy men ózge de munaı tasıtyn kemelerdiń qozǵalysyn shekteý qaýpi joq emes. Mundaı táýekel Iran men Taıaý Shyǵys elderi aınalysyndaǵy máseleler týyndaı qalǵanda árqashan bolatyny belgili. Kórip otyrǵanymyzdaı, qazir Iran bul jaǵdaıǵa qoldaý kórsetip otyr», - dedi Oljas Baıdildınov Kazinform tilshisiniń saýalyna jaýap bere otyryp.

Sarapshynyń aıtýynsha, osy jaǵdaıdy utymdy qoldanyp, munaı saýdasynan paıda tapqysy keletinder endi bas kótermek.

«Shıelenis aımaqtarynda únemi táýekel bolatyny anyq. Degenmen, munaı tasymalyna qatysty dál qazir eshqandaı shekteý joq. Eger jaǵdaı shıelenisse, ıaǵnı Iranǵa salynǵan sanktsııalar kúsheıe tússe jáne dıversııa jasalsa ǵana munaı naryǵyna teris áser etedi. Sonymen qatar, qazir osy oqıǵalardan paıda taýyp qalǵysy keletinder shyǵady», - dep boljam jasady sarapshy.

Oljas Baıdildınov atap ótkendeı, Izraıl men Palestına arasyndaǵy ahýal Qazaqstannyń munaı eksporty men álemdik «qara altynnyń» qunyna áser etpeıdi.

Eske salaıyq, keshe energetıka mınıstri Almasadam Sátqalıev Izraıldegi qaqtyǵystyń munaı naryǵyna áseri boıynsha pikir bildirdi. Vedomstvo basshysynyń aıtýynsha, munaı satyp alatyn negizgi elderden túsken suranys artqan.

Sondaı-aq, qazaqstandyq ekonomıst Baýyrjan Ysqaqov munaı baǵasynyń kóterilýi qaqtyǵystarǵa baılanysty emes ekenin aıtyp, Taıaý Shyǵystaǵy shıelenistiń Qazaqstan ekonomıkasyna tıgizer áserine boljam jasady.