Trassadaǵy maldyń kesirinen Túrkistan oblysynda 2 adam qaza taýyp, 12-si jaraqattandy
Túrkistan oblystyq Polıtsııa departamenti jergilikti polıtsııa qyzmeti basqarmasynyń bastyǵy Asylhan Tórehanovtyń aıtýynsha, jyl basynan beri óńirde jol boıynda júrgen úı janýarlarynyń kesirinen 5 jol-kólik oqıǵasy tirkelgen. Saldarynan 12 adam túrli dene jaraqatyn alsa, ókinishke oraı 2 adam qaza tapqan. Al ótken jyly osy sebeppen 23 adam jaraqat alyp, 11 adam kóz jumdy.
Sondaı-aq ol jol-kólik oqıǵalaryna sebep bolatyn ózge de jaǵdaılardy atady. Máselen, manevr jasaý erejelerin buzý, qozǵalystyń qarsy jolaǵyna shyǵý, qozǵalys jyldamdyǵyn asyrý, kólikte otyryp uıaly telefon qoldaný, rýlde uıyqtap ketý jaǵdaılary kóptep oryn alady.
«Jolǵa shyqqanda barynsha saq bolý kerek. Bizdiń maqsat aıyppul salý emes, barynsha túsindirme jumystaryn júrgizip, jol apattarynyń aldyn alý, boldyrmaý. Osy baǵytta «Quqyqtyq tártip», «Avtobýs», «Qaýipsiz jol» degen is-sharalardy atqaryp kelemiz», - dedi Asylhan Tórehanov.
Polıtsııa polkovnıgi atap ótkendeı, QR ІІM nusqaýyna sáıkes aǵymdaǵy jyldyń 14-20 naýryz kúnderi aralyǵynda oblys aýmaǵynda «Quqyqtyq tártip» jedel-profılaktıkalyq is-sharasy ótkizildi.
Reıd barysynda buryn qylmys jasaǵany úshin izdeýde júrgen 20 qylmysker ustalyp, oblys boıynsha 4843 ákimshilik quqyqbuzýshylyq anyqtalǵan.