Tranzıttik kólikterge dızel otyny saralanǵan baǵamen beriledi

NUR-SULTAN. QazAqparat – Tranzıttik kólikter úshin dızel otyny saralanǵan baǵamen beriledi. Bul jaıynda QR Energetıka mınıstri Bolat Aqsholaqov aıtty, dep habarlaıdy QazAqparat tilshisi.

«Úkimet otyrysy barysynda Memleket basshysy elimizdiń energetıkalyq qaýipsizdigin qamtamasyz etý jóninde birqatar naqty tapsyrma berdi. Birinshiden, tranzıttik kólik úshin jáne shekara perımetri boıynsha saralanǵan baǵalar ázirleý arqyly dızel otynynyń tapshylyǵyn boldyrmaý mindeti qoıyldy. Shekara qyzmetiniń málimetinshe, Qazaqstan Respýblıkasynda kúnine 4,5 myńǵa jýyq júk kóligi kiredi, onyń 70 paıyzy - sheteldik kólik. Respýblıkadaǵy jańar-jaǵarmaı quıý stantsııalaryndaǵy tómen baǵalar ortasha aılyq tutynýdyń shamamen 120 myń tonnaǵa ósýine alyp keledi», - dedi ol Ortalyq kommýnıkatsııalar qyzmetindegi baspasóz máslıhatynda.

Bolat Aqsholaqovtyń atap ótýinshe, qazirgi ýaqytta Energetıka mınıstrlik dızel otynyna saralanǵan baǵalardy kózdeıtin buıryq jobasyn ázirledi.

«Baǵalar rezıdenttikke, tutyný kólemine jáne kólik túrine baılanysty saralanady. Osy baǵyttaǵy jumys múddeli memlekettik organdarmen jáne taraptarmen jalǵasatyn bolady», - dedi Bolat Aqsholaqov.