Transshekaralyq sýlardy paıdalaný jónindegi BUU konventsııasy keńesiniń sessııasy ótedi
Qazaqstan Prezıdenti Ortalyq Azııanyń transshekaralyq sý resrýstary óńirdiń barlyq halqynyń ıgiligi ári ortaq baılyǵy ekenin atap ótti. Sondyqtan sý resýrstaryn aqylǵa sıymdy jáne ádil paıdalaný mıllıondaǵan adamnyń taǵdyryna tikeleı áser etedi, óńirdiń turaqtylyǵy men ál-aýqatynyń artýyna septigin tıgizedi.
«Sondyqtan óńir memleketterinde bul salaǵa qatysty túrli tıimdi ıdeıalar men naqty jobalar bar. Olar álemdik qoǵamdastyqtyń nazaryn Aral teńizi basseıniniń problemasyn aýdarýǵa jáne olardy sheshý joldaryn izdeýge septigin tıgizedi», - dep atap ótti Elbasy.
Máselen, Memleket basshysynyń dereginshe, túrikmen tarapynyń bastamasymen Birikken Ulttar Uıymynyń qamqorlyǵymen Aral teńizi basseıni elderi úshin BUU-nyń arnaıy baǵdarlamasyn qabyldaý máselesi qarastyrylyp jatyr. Al tájik tarapynyń bastamasymen BUU Bas assambleıasy 2018 jyldy «Turaqty damý úshin sý» is-qımylynyń halyqaralyq onjyldyǵy dep jarııalanǵan. Ózbek tarapy osy jyldyń maýsymynda Tashkentte Ortaazııalyq halyqaralyq ekologııalyq forým ótkizgen. Qyrǵyz tarapynyń bastamasymen «Shý men Talas ózenderi basseınderi úshin is-qımyldyń strategııalyq baǵdarlamasy» ázirlengen.
«Óz kezeginde, Astana aǵymdaǵy jyldyń 10-12 qazanynda Transshekaralyq sýlar men halyqaralyq kólderdi qorǵaý jáne paıdalaný jónindegi BUU konventsııasy taraptary keńesiniń segizinshi sessııasyn qabyldaıdy. Bul shara alǵash ret Eýropadan tys jerde ótetin bolady jáne bul taqyryptaǵy jalpyóńirlik kúsh-jiger sebetine óz úlesin qosady. Sharaǵa 160 eldiń ókili qatysady dep kútilýde. Osy sátti paıdalanyp, atalǵan forýmnyń jumysyna belsendi qatysý úshin sizderdiń de delegatsııalaryńyzdy shaqyramyn», - dedi Nursultan Nazarbaev.