Transshekaralyq ózender sýy azaıyp barady – Ekologııa mınıstrligi

NUR-SULTAN. QazAqparat – Sońǵy 2-3 jylda transshekaralyq ózender sýynyń azaıýy baıqalady. Bul týraly «Habar 24» telearnasynyń «Kún tártibi» baǵdarlamasynda QR Ekologııa, geologııa jáne tabıǵı resýrstar mınıstrligi Transshekaralyq ózender departamentiniń dırektory Arsen Jaqanbaev aıtty, dep habarlaıdy QazAqparat tilshisi.

«Transshekaralyq ózendermen sýdyń az aǵyp kelýin sońǵy 2-3 jylda baıqap otyrmyz. Eń aldymen bul - tabıǵı qubylys. Qazirgi ýaqytta álemdegi problema klımattyń ózgerýi bolyp tur. ıAǵnı, kún jylynyp qurǵaqshylyq oryn alýda. Ekinshiden, ár memlekettiń turǵylyqty turǵyndarynyń damýy, ósýi bar. Soǵan oraı sýdy tutyný kólemi artyp keledi», - dedi ol.

Osy rette ol Reseıden keletin Jaıyq ózeni sýynyń sońǵy 2-3 jylda azaıyp ketýi elimizdiń Batys óńirine zardabyn tıgizip otyrǵanyn aıtty.

«Reseı tarapymen birneshe kelissóz júrgizgen edik. Olar sýdy eń aldymen óz qajetine paıdalanady. Biz sýdyń tómengi saǵasynda otyrǵandyqtan olar paıdalanǵannan qalǵan sýdy qoldanamyz. Jalpy, ár memleketpen transshekaralyq ózendi paıdalanýǵa qatysty kelisim bar. Máselen, Reseımen 2013 jyly bekitilgen kelisim bar. Sol kelisimniń aıasynda ár ózen boıynsha 6 jumys toby qurylǵan. Aıtalyq, Jaıyq pen Tobyl ózeni 1996 jylǵy hattamamen retteledi. Sol qujatqa sáıkes sý az, ortasha jáne kóp jyldary ózimizge kerekti sý mólsherin alamyz. Biraq, Jaıyq ózeniniń ózindik sıpattamasy bar. Jaıyqtyń sý az tsıkli óte uzaq bolady. Ol 5-6 jylǵa sozylýy múmkin. Sonyń saldary bizdiń ekologııamyzǵa tıedi», - dedi Arsen Jaqanbaev.