Transshekaralyq ózender boıynsha kórshi eldermen kelissózder júrgizý kerek – mınıstr

NUR-SULTAN. QazAqparat – Transshekaralyq ózenderde sýdy ádil bólý úshin kórshi eldermen yntymaqtastyqty nyǵaıtý kerek. QR Ekologııa, geologııa jáne tabıǵı resýrstar mınıstri Maǵzum Myrzaǵalıev osylaı dedi, dep habarlaıdy QazAqparat tilshisi.

«Sý resýrstaryn basqarý salasyna baılanysty myna máselelerge nazarlaryńyzdy aýdarǵym keledi. Birinshiden, transshekaralyq ózenderdegi sý deńgeıiniń azaıý qaýpi bar. Ortasha kóp jyldyq sý aǵyny 100 tekshe shaqyrymdy quraıdy. Onyń ishinde 44 paıyzy kórshi elderden keledi. Sý tapshylyǵyn boldyrmaý úshin bizge Qytaıdan aǵatyn transshekaralyq ózenderde sý bólýdi ádil jáne ózara tıimdi kelisim quryp, sondaı-aq Ortalyq Azııa elderimen (Ózbekstan, Qyrǵyzstan, Tájikstan) jáne Reseı Federatsııasymen eki jaqty yntymaqtastyqty nyǵaıtý kerek», - dedi mınıstr OKQ-da ótken baspasóz máslıhatynda.

Onyń aıtýynsha, tıisti eki jaqty komıssııalar jumys istep, kelissózder turaqty negizde júrgizilýde.

«Ysyrap bop jatqan sý mólsherin azaıtý úshin arnalardy jóndeý jáne sý resýrstaryn avtomatty túrde basqarýdy engizý talap etiledi. Osylaı, egiske deıin tasymaldaý kezinde sý ysyrabyn azaıtý maqsatynda gıdromelıoratıvtik júıelerdi qaıta qurý is-sharalary belsendi túrde júrgizilýde», - dedi ol.

Maǵzum Myrzaǵalıev elimizdegi ishki jáne syrtqy sý qaýipsizdigin eskere otyryp, sý resýrstaryn basqarýdyń 2020-2030 jyldarǵa arnalǵan memlekettik baǵdarlamasyn jáne sý salasyn tsıfrlandyrý tujyrymdamasyn ázirleý jumysy bastalǵanyn aıtady. Baǵdarlamany kelesi jyly bekitý josparlanyp otyr.