«Transneft» kondıtsııasyz munaı úshin 5 qazaqstandyq kompanııaǵa tólem júrgizdi

NUR-SULTAN. QazAqparat – «Transneft» kondıtsııasyz munaı úshin 5 qazaqstandyq munaı kompanııasyna tólem júrgizdi. Bul jaıynda «QazTransOıl» AQ-tan málim etti, dep habarlaıdy QazAqparat tilshisi.

Kompanııa málimetinshe, Ýst-Lýga portynda shamamen 699 myń tonna kondıtsııasyz munaıdy tıegeni úshin shyǵyndardy óteý máselesine qatysty 38 qazaqstandyq munaı kompanııasynyń atynan málimdeme jasaıtyn «Transneft» JAQ pen «QazTransOıl» AQ arasyndaǵy qol qoıylǵan kelisim bar. Atalǵan kelisimge sáıkes, 5 qazaqstandyq munaı kompanııasyna «Transneft» JAQ tarapynan tólemder júrgizildi. Munyń aldynda 32 kompanııaǵa tólem jasalǵan.

2019 jyldyń sáýir-mamyr aılarynda «Transneft» JAQ-tyń magıstraldyq munaı qubyrlary júıesimen tasymaldanatyn munaıda hlororganıkalyq qosylystardyń joǵary shoǵyrlanýyna baılanysty tótenshe jaǵdaı qalyptasqan. Bul Ýst-Lýga portyndaǵy tankerlerge qazaqstandyq júk jóneltýshilerdiń kondıtsııasyz munaıyn tıeýge sebep boldy.