Transkaspıı halyqaralyq baǵytynda jańa konteınerlik poıyz iske qosyldy

NUR-SULTAN. QazAqparat - Alǵash ret Sıan (Qytaı) - Izmıt (Túrkııa) baǵytyndaǵy konteınerlik poıyz Qazaqstan arqyly Transkaspıı halyqaralyq kólik baǵytymen (THKB) júrip ótti. Bul týraly «QTJ» kompanııasy baspasóz qyzmetinen málim boldy, dep habarlaıdy QazAqparat.

Poıyz Respýblıka aýmaǵyna Altynkól shekara beketi arqyly keldi. Keıin poıyz THKB baǵdarymen júk Aqtaý portyna ótip, Baký portyna fıderlik kememen, odan ári Ázerbaıjan men Grýzııa aýmaqtary arqyly Túrkııaǵa jetkiziledi.

Ártúrli tutyný taýarlary tıelgen 41 qyryqfýttyq konteınerlerden turatyn poıyz jóneltý pýnktinen mejeli jerge deıingi qashyqtyqty 16 kún ishinde júrip ótedi.

«Tranzıttik baılanysta 2020 jyldyń úsh aıynda Transkaspıı baǵyty arqyly 1,1 myń JFE (jıyrmafýttyq ekvıvalent) tasymaldandy», - dedi «KTZ Express» AQ Bas dırektory Dmıtrıı Abdýllaev.

Onyń aıtýynsha, marshrýt qazaqstandyq eksporttaýshylarǵa óz ónimderin Ázerbaıjanǵa, Grýzııaǵa, Túrkııaǵa, sondaı-aq Qara jáne Jerorta teńizderiniń porttaryna jetkizýge múmkindik beredi, sonymen qatar kompanııa qolaıly tarıftik jaǵdaılardy jasaý men transqazaqstandyq baǵytqa júk kólemin tartý boıynsha turaqty jumys isteıdi.