Transkaspıı halyqaralyq kólik marshrýtynyń úılestirý platformasy iske qosyldy

<p>ASTANA. KAZINFORM &ndash; Eýropalyq komıssııa men Qazaqstan iske qosqan jańa platforma Transkaspıı kólik marshrýtyn Eýropany Azııamen 15 kún nemese odan az ýaqyt ishinde baılanystyratyn mýltımodaldy jáne básekege qabiletti baǵytqa aınaldyrý maqsatynda jumys isteıdi.</p>

QR Kólik mınıstrliginiń baspasóz qyzmetine usynǵan málimetke súıensek, is-shara Ortalyq Azııa elderiniń jáne dáliz boıynda ornalasqan basqa elderdiń, sondaı-aq halyqaralyq qarjy ınstıtýttary men Eýroodaq quramyna kirmeıtin G7 elderiniń ókilderiniń qatysýymen ótken.

Kólik mınıstrliginiń basshysy Marat Qarabaevtyń aıtýynsha, kólik ınfraqurylymyn damytý jáne kólik baılanystaryn kúsheıtý óńirlerdiń ekonomıkalyq ósýi men órkendeýi barysynda mańyzdy ról atqarady.

«Úılestirý platformasynyń qurylýy bizge ortaq maqsattarǵa jetý úshin kúshimizdi biriktirýge, tájirıbe men pikir almasýǵa biregeı múmkindik beredi. Bul jumysqa Ázerbaıjan, Armenııa, Grýzııa, sondaı-aq Túrkııadan kelgen áriptesterimiz shaqyrylǵanyn atap ótkim keledi. Bul óz kezeginde Transkaspıı halyqaralyq kólik baǵytyn damytý boıynsha iri jáne turaqty maqsattardy iske asyrý aıasynda mańyzdy ról atqarady», – dep atap ótti vedomstvo basshysy.

Óz kezeginde Halyqaralyq seriktestik jónindegi bas dırektorattyń birinshi dárejeli keńesshisi Henrık Hololeı:

«Transkaspıı halyqaralyq kólik marshrýty úshin qurylǵan úılestirý platformasy Ortalyq Azııa men Eýropanyń arasyn jaqyndatýǵa baǵyttalǵan yntymaqtastyǵymyz barysynda alǵa jasalǵan eleýli qadam. Turaqty kólik baılanysy aımaqtyń ekonomıkalyq ósýin jáne onyń Eýropamen baılanysyn nyǵaıtý úshin óte mańyzdy. Biz seriktesterimizge damý jáne qorshaǵan ortany qorǵaý maqsattaryna qol jetkizýde qoldaý kórsetýge nıettimiz», – dedi.

Eýropalyq utqyrlyq jáne kólik komıssııasy Bas dırektorynyń orynbasary Maııa Bakran: «Úılestirý platformasy Transkaspıı halyqaralyq kólik baǵytyn Eýropany, Kavkazdy jáne Ortalyq Azııany baılanystyratyn mýltımodaldy jáne zamanaýı baǵytqa aınaldyrýǵa yqpal etedi. Ártúrli múddeli taraptardyń úılestirý áreketteri aımaqtyń turaqty ekonomıkalyq damýyna úles qosady», dep óz oıyn ortaǵa saldy.

Tutastaı alǵanda, platforma atalǵan dálizdiń jumysyn ilgeriletýge jáne Ortalyq Azııadaǵy ınfraqurylym salasyndaǵy basym jobalardy iske asyrý jónindegi kúsh-jigerdi úılestirýge yqpal etetin bolady. Ol sondaı-aq temirjol, jol jáne port ınfraqurylymyna ınvestıtsııalardy yntalandyrady jáne úılestiredi.