Transformatsııalaý baǵdarlamasy qazaqstandyq kompanııalarǵa ne beredi

ASTANA. QazAqparat - «Samuryq-Qazyna» aktsıonerlik qoǵamy basqarmasyna qarasty kompanııalarǵa engizilgeli jatqan transformatsııalaý baǵdarlamasy bızneske 100 paıyzdyq paıda ákeledi. Bul týraly «Samuryq-Qazyna» AQ basqarma tóraǵasy Ómirzaq Shókeev transformatsııalaý boıynsha atqarýshy komıtettiń otyrysynda atap ótti, dep habarlaıdy «QazAqparat» HAA tilshisi.

Basqarma tóraǵasynyń aıtýyna qaraǵanda, transformatsııalaý baǵdarlamasy bıznesti 100 paıyz alǵa súıreıdi.

«Baǵdarlamanyń ár jobasynyń ózindik paıdasy bar. Bul jobalardy aınalysyp jatqan adamdardyń isimen dáleldengen. Biz transformatsııalaý arqyly 100 paıyzdyq paıdaǵa jetetinimizdi bilip otyrmyz. Biz búgin aıtyp otyrǵan jobalar - protsestiń bir bóligi ǵana. Muny barlyǵyn túsiný kerek», -deıdi holdıng basshysy.

Ómirzaq Shókeevtiń aıtýynsha, transformatsııalaý qyzmettik mindettemelerdi retteı otyryp, ortaq ekonomıkalyq ósimdi qamtamasyz etedi.

«Transformatsııalaýdy kóp adamdar túsiniksiz ıdeıa dep uǵyp júrýi múmkin. Іs júzinde transformatsııalaý - shaǵyn jobalarǵa bólingen óte paıdaly joba. Qyzmetkerlerdiń árqaısysy óz isimen ǵana aınalysyp, túpki maqsatyn biletin bolady», - deıdi ol.

Sonymen birge, holdıng basshysy transformatsııalaý protsesi sarapshylardyń úzdik býynyn qalyptastyratynyna senim bildirdi.

«Transformatsııalaý protsesi ózine kóptep menedjerlerdi tartyp jatyr. Meni solardyń kóbi jas bola otyryp, kásibı turǵyda shyńdala túskeni qýantady. Bizdiń búgingi komıtettiń bir artyqshylyǵy - baıandamalardyń basym bóligin dırektorlar ǵana emes, olardyń komandasyndaǵy jas mamandar jasasyn dep qalaýymdy bildirdim», - deıdi Ómirzaq Shókeev.

Aıta ketsek, budan buryn Ómirzaq Shókeev barlyq uıymdar, kommertsııalyq kompanııalar transformatsııalaý baǵdarlamasy negizinde úsh baǵytta damı alatynyn málim etken bolatyn. Olar: menedjerlerdiń sapasy, protsesterdiń sapasy men tehnologııalar.

«Barlyq bıznes osy úsh baǵytqa táýeldi», - deıdi ÓmirzaqShókeev.