Transformatsııa nátıjesinde «Samuryq-Qazyna» AQ kompanııalarynyń ekonomıkalyq tıimdiligi 100 mlrd. teńgege jetedi

ASTANA. QazAqparat - Transformatsııa baǵdarlamasynyń nátıjesinde «Samuryq-Qazyna» kompanııalar tobynyń ekonomıkalyq tıimdiligi 3-4 jyldan soń 100 mıllıard teńgege jetedi. Búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte «Samuryq-Qazyna» Ulttyq ál-aýqat qory» AQ basqarma tóraǵasy Ómirzaq Shókeev osylaı málim etti.

Qor basshysynyń aıtýynsha, qazirdiń ózinde transformatsııa baǵdarlamasy boıynsha enshiles kompanııalar Dırektorlar keńesiniń negizgi qyzmetter kórsetkishi ázirlengen. Onda atalǵan kompanııalar úshin olarǵa uqsas álemdegi kompanııalar kórsetkishteri negizinde maqsattar men mindetter aıqyndalady. Al Dırektorlar keńesi óz kezeginde árbir top-menedjerden bastap, orta býyn basshylary men qatardaǵy qyzmetkerler úshin negizgi qyzmetter kórsetkishin aıqyndaıdy.

«Osylaısha, biz naqty jaǵdaıǵa súıene otyryp, árbir qyzmetkerdiń paıdasyn, onyń belgili bir nátıjege qatysýyn baǵalaıtyn bolamyz. Tutastaı alǵanda, «Samuryq-Qazyna» kompanııalar toby transformatsııa baǵdarlamasyn júzege asyrý arqyly aldaǵy 3-4 jyldyń ishinde shamamen 100 mıllıard ekonomıkalyq tıimdilikke qol jetkizýdi boljaıdy», - dedi Ó. Shókeev.

«Transformatsııanyń nátıjeliligine kelsek, tek bir ǵana «Qazaqstan temir joly» kompanııasynyń ózi jyl saıyn 20 mıllıard teńge paıda kóretin bolady. Salystyrmaly túrde alsaq, «Qazaqstan temir jolynyń» byltyrǵy jylǵy taza tabysy 27,3 mıllıard teńgeni qurady. Al biz osy baǵdarlamanyń arqasynda ol kórsetkishti eki esege jýyq artta alamyz», - dedi Qor basshysy.