Transaýǵan dálizi Ortalyq Azııa elderine qandaı múmkindik ashady

<p>TAShKENT. KAZINFORM &ndash; Ortalyq Azııa elderi jeke dara kózqarastan oıysyp, ońtústikke baǵyt alatyn halyqaralyq saýda joldaryn birlesip damytýy tıis. Qazirgi ýaqytta jıi talqylanyp júrgen transaýǵan dálizin qurý bastamasyna qatysty pikir bildirgen ózbekstandyq ekonomıst, Tashkent memlekettik ekonomıkalyq ýnıversıtetiniń professory Mýrat Ikramov osylaı málim etti, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttiginiń Tashkenttegi menshikti tilshisi Álıhan Asqar.</p>

Qazaqstan men Ózbekstannyń kólik-logıstıka salasyn ilgeriletýge qatysty ustanatyn kózqarasy kóbine uqsas. Sonyń ishinde transaýǵan temirjolyn qurý qos tarap úshin de asa mańyzdy. Ol Ortalyq Azııany Aýǵanstan jáne Pákistan, odan ári Parsy shyǵany elderimen tikeleı baılanystyrady.

«Úndi muhıtyna tikeleı jol ashatyn eldiń biri – Aýǵanstan. Kez kelgen tasymal sol dáliz ótip jatqan memleketke paıda ákeledi. Demek, aýǵan tarapynyń bul jobadan utary az bolmaıdy. Tıisinshe, Ortalyq Azııaǵa da bereri mol. Qazaqstan men Ózbekstan osy jobaǵa qanshalyqty múddeli bolsa, transaýǵan dálizi máselesiniń sheshimi de sonshalyqty jeńildeı túsedi», - dep pikir qosty belgili ózbekstandyq ekonomıst Mýrat Ikramov.

Sarapshynyń pikirinshe, Ortalyq Azııa elderi iri jobalardy birlesip, ózara seriktestikte qolǵa alǵany jón.

«Ortalyq Azııa jeke dara kózqarastan oıysyp, ózara ıntegratsııalanýy tıis. Keıin soǵan saı, óńirge baǵyttalatyn ınvestıtsııa kólemi ulǵaıady, birlesken jobalardyń tıimdiligi artady», - dedi Mýrat Ikramov.

2021 jyly Ózbekstan, Pákistan jáne Aýǵanstan uzyndyǵy 600 shaqyrymǵa jýyq «Termez – Mazarı Sharıf – Kabýl – Peshavar» temirjolyn salý boıynsha kelisimge qol qoıǵan. Alaıda qarjy tapshylyǵy jáne aýǵan jerindegi saıası jaǵdaıǵa baılanysty qurylysty bastaý merzimi keıinge shegerildi. Byltyrdan beri kelissóz qaıta jandandy.

Ózbekstan bıligi jobany qarjylandyrýǵa múddeli arab memleketterimen túrli formatta kezdesý ótkizdi. Oǵan qatysýǵa Qazaqstan da daıyn. Bıyl sáýirde QR Premer-Mınıstriniń orynbasary Serik Jumanǵarın men Aýǵanstan ýaqytsha úkimetiniń vıtse-premeri Abdýlanı Baradar arasynda ótken kelissóz barysynda bizdiń el jobaǵa qosylýǵa nıet bildirdi. Bul rette qazaqstandyq sarapshylar transaýǵan jobasy eksporttyq áleýetti 40% ulǵaıtýǵa múmkindik beretinin alǵa tartyp otyr. Atap aıtqanda, 2029 jylǵa qaraı atalǵan dáliz arqyly alys-beris 3 ese ósýi tıis.

Aıta keteıik, keıingi 2 jyldyń ishinde Aýǵanstanǵa baǵyttalǵan qazaqstandyq eksport kólemi 14 paıyzǵa artqan.

Ózbekstandyq sarapshylar atap ótkendeı, bul iste endi Aýǵanstandaǵy saıası jaǵdaıdyń turaqtylyǵy ári qaýipsizdiktiń tıisti deńgeıde qamtamasyz etilýi mańyzdy. Resmı Kabýl buǵan óz tarapynan kepildik berip, qurylysqa múddeli taraptardy shaqyryp jatyr.