Tramptyń Twitter-degi jazbalary jumysymyzǵa kedergi – AQSh bas prokýrory

VAShINGTON. QazAqparat - AQSh-tyń bas prokýrory jáne Ádilet mınıstri Ýılıam Barr prezıdent Donald Tramptyń Twitter-degi jazbalary Ádilet mınıstrliginiń jumysyna kedergi keltiretinin málimdedi, dep habarlaıdy QazAqparat AVS News telearnasyna silteme jasap.

Ol prezıdentten qylmystyq ister týraly tvıt jazyp, sol isterge baılanysty resmı málimdeme jasaýdy doǵarýyn surady.

Bas prokýrordyń aıtýynsha, D.Tramptyń prezıdenttiń burynǵy keńesshisi Rodjer Stoýnnyń isine qatysty jazbalary mınıstrlik jumysyn qıyndatýda.

«Tramp jeke ózime bul is boıynsha eshteńe aıtpady. Al onyń mınıstrlik, vedomstvo qyzmetkerleri, sýdıalar týraly jazbalary bizge kedergi jasaıdy. Qylmystyq ister týraly tvıt jazýdy doǵaratyn ýaqyt keldi. Sebebi bul mindet Ádilet mınıstrliginiń quzyrynda», - dedi mınıstr.

Aıta ketý kerek, AQSh basshysy qańtar aıynda Twitter-ge bir kúnde jarııalaǵan jazbalardyń sany boıynsha óz rekordyn jańartqan bolatyn.