Trampqa para alý isi boıynsha úkim 10 qańtarda shyǵady

<p>ASTANA. KAZINFORM &ndash; Sot jańadan saılanǵan prezıdent Donald Tramptyń isti toqtatý týraly ótinishin qabyldaǵan joq jáne ol úkimdi ulyqtaý rásimine on kún qalǵanda, 10 qańtarda shyǵaratynyn málimdedi, dep habarlaıdy Kazinform menshikti tilshisi <a href="https://www.nbcnews.com/politics/donald-trump/judge-orders-trump-sentenced-hush-money-case-jan-10-says-wont-incarcer-rcna186189" target="_blank" rel="noopener">NBC News</a>-ke silteme jasap.</p>

Sýdıa Hýan Merchan Donald Tramptyń úkim shyǵarýǵa jeke ózi nemese vırtýaldy túrde qatysa alatynyn, biraq ol ony túrmege jabýǵa buıryq bermeıtinin málimdedi.

Sýdıa Tramptyń úkimdi buzý týraly ótinishin qabyldaǵan joq, ol 12 alqabı biraýyzdan sottalýshyny aldaý nıetimen iskerlik jazbalardy burmalaý, sonyń ishinde zańsyz jolmen prezıdenttik saılaýdy jyljytý úshin qastandyq jasaý nemese jasyrý nıeti boıynsha kináli dep tanyǵanyn atap ótti.

Eske sala ketsek, 2024 jyldyń sáýirinde Nıý-Iorkte AQSh-tyń burynǵy prezıdenti Donald Tramptyń pornojuldyz Stormı Denıelske 130 myń dollar tóleý isi boıynsha sot protsesi bastaldy.

Nıý-Iork cotynda alqabıler AQSh-tyń burynǵy prezıdenti Donald Trampty 2016 jylǵy saılaý aldynda burynǵy pornoaktrısa Stormı Denıelske qatysty tólemaqyny saılaýshylardan jasyrý úshin qarjy esebin burmalaǵany úshin kináli dep tapty.

- Osy kezeńde sottyń aıyptaý úkimimen bekitilgen qandaı da bir bas bostandyǵynan aıyrý jazasyn taǵaıyndamaý nıeti týraly aıtý oryndy sııaqty, - dep jazdy sýdıa óz qaýlysynda.

Juma kúni keshke Donald Tramp Truth Social saıtyndaǵy jazbalarynda sýdıany, sheshimdi jáne jalpy isti synǵa aldy.

- Bul zańsyz saıası shabýyl – jalǵan farstan basqa eshteńe emes, - dep málimdedi Donald Tramp.

Tramptyń baspasóz hatshysy Stıven Chýng bul sheshimdi «Joǵarǵy sottyń ımmýnıtet týraly sheshimin jáne basqa da qalyptasqan sot tájirıbesin tikeleı buzý» dep atady.

- Bul zańsyz is múldem qozǵalmaýy kerek edi jáne Konstıtýtsııa ony dereý toqtatýdy talap etedi, - dep qosty Chýng.

Donald Tramp úkim shyǵarý protsesine jeke ózi kele me, álde vırtýaldy túrde kelýdi josparlap otyr ma, belgisiz.

Osyǵan deıin AQSh-qa sońǵy onjyldyqtaǵy eń qatty boran soǵýy múmkin ekeni týraly jazdyq.