Trampqa qatysty taǵy bir sot kelesi jyldyń 4 naýryzynda bastalatyn boldy

ASTANA. QazAqparat - AQSh-tyń burynǵy prezıdenti Donald Tramptyń 2020 jylǵy prezıdent saılaýy nátıjesiniń kúshin joıý týraly isi 2024 jyldyń 4 naýryzynan bastap qaralady. Federaldy sýdıa Tanıa Chýtkan osylaı dep sheshti. Bul týraly QazAqparat VVS-ge silteme jasap habarlaıdy.

«Qoǵam bul máseleni tekz jáne tıimdi sheshýge quqyly», - dedi ol.

Arnaıy prokýror Djek Smıt AQSh-tyń 45-shi prezıdentine qatysty sot isin 2024 jyldyń 2 qańtarynda, al Tramptyń advokattary 2026 jyldyń sáýirinde - saılaýdan keıin 17 aı ótken soń bastaýdy surady.

«Sot otyrysynyń kúnin belgileý sottalýshynyń kásibı mindettemelerine qaramaıdy, sondyqtan Tramp myrza osy kúnge kelisýi kerek», – dedi sýdıa.

Aıyptaý qorytyndysynda Trampqa tórt tarmaq boıynsha aıyp taǵylyp jatyr, sonyń ishinde AQSh-ty aldaý, resmı rásimderge kedergi jasaý jáne azamattardyń quqyǵyn buzý jóninde sóz baılasý bar.

Donald Trampqa Amerıka Qurama Shtattarynyń burynǵy jáne qazirgi prezıdentteri arasynda birinshi bolyp qylmystyq aıyp taǵyldy. Saılaý nátıjesin joıý - Trampqa qarsy tórt qylmystyq istiń biri.

Eks-prezıdent búkil aıypty joqqa shyǵaryp otyr.

77 jastaǵy Tramp kelesi jyly prezıdent saılaýyna qatysýǵa nıetti jáne Respýblıka partııasynyń kandıdaty bolýǵa úmitkerler arasynda kósh bastap tur.

Prezıdenttikke kandıdattyń partııaishilik saılaýy qańtarda bastalady, sondyqtan sot protsesi praımerızdiń qyzǵan shaǵynda ótedi.

Kelesi jyldyń 25 naýryzynda Tramp Nıý-Iorkte pornoaktrısaǵa aqsha tólegeni úshin qarjylyq alaıaqtyq jasady degen aıyppen sotqa tartylady, al mamyr aıynda Florıdada qupııa qujattardy durys paıdalanbady degen aıyppen sot otyrysy ótedi.

Trampqa jáne taǵy 18 qatysýshyǵa Djordjııa shtatynda 2020 jylǵy saılaý nátıjesin joıý áreketteri úshin aıyp taǵylyp otyr. Bul protsestiń bastalý kúni áli belgilenbegen.