Tramp pen SoftBank AQSh-qa 100 mlrd dollar ınvestıtsııa quıady

<p>ASTANA. KAZINFORM — SoftBank bas dırektory Masaıoshı Son Florıdada jańadan saılanǵan prezıdent Donald Tramppen kezdesý barysynda aldaǵy 4 jylda 100 mlrd dollar ınvestıtsııa quıylatynyn málimdedi.</p>

Bul týraly Kazinform agenttigi CNBC-ke silteme jasap habarlaıdy. 

Mıllıarder ınvestor jáne japondyq tehnologııalyq ınvestıtsııalyq fırmanyń negizin qalaýshy Donald Tramppen birlesken málimdemede jasandy ıntellekt pen onymen baılanysty ınfraqurylymǵa baǵyttalǵan keminde 100 myń jumys ornyn qurýǵa ýáde berdi. Aqsha Donald Tramptyń ókilettiginiń sońyna deıin ornalastyrylady. 

— Bul tarıhı ınvestıtsııa Amerıkanyń bolashaǵyna degen senimniń monýmentaldy kórinisi jáne ol jasandy ıntellekt, jańa tehnologııalar jáne erteńgi basqa salalar dál osynda, AQSh-ta qurylyp, damıtynyna kepildik berýge kómektesedi, — dedi Donald Tramp.

Qarjylandyrý «SoftBank» basqaratyn ártúrli kózderden, sonyń ishinde «Vision Fund» nemese chıp óndirýshi «Arm Holdings» esebinen bolýy múmkin. 

Masaıoshı Son men Donald Tramp 2016 jyly Tramp alǵash ret prezıdent bolyp saılanǵannan keıin osyndaı málimdeme jasady: japondyq fırma 50 myń jumys ornyn qurý úshin 50 mlrd dollar ınvestıtsııalaýǵa kelisti.

Eske sala ketsek, Time jýrnalynyń nusqasy boıynsha jyl adamy ataǵy AQSh-tyń jańadan saılanǵan prezıdenti Donald Trampqa buıyrdy.