Tramp Ilon Maskty úkimettik tıimdilik departamentiniń basshysy qyzmetine taǵaıyndady

<p>ASTANA. KAZINFORM &ndash; Donald Tramp saılaý kezinde ózin qoldaǵan Ilon Maskty Úkimet tıimdiligi departamentiniń jańa basshysy etip taǵaıyndady. Tramp sonymen birge Fox News arnasynyń júrgizýshisin Pentagonnyń basshysy etýge nıetti.</p>

Amerıka Qurama Shtattarynyń jańa prezıdenti Donald Tramp bıznesmen, Tesla jáne Space X negizin qalaýshy Ilon Maskty úkimettiń tıimdiligi departamentiniń jańa basshysy etip taǵaıyndady. Bul týraly saıasatker óziniń Truth áleýmettik jelisinde habarlady.

– Men uly Ilon Masktyń amerıkandyq patrıot Vıvek Ramasvamımen birge úkimet tıimdiligi departamentin (DOGE) basqaratynyn qýana habarlaımyn, – dep málimdedi Tramp.

– Osy eki amerıkandyq birge meniń ákimshiligime memlekettik bıýrokratııany joıýǵa, shyǵyndardy qysqartýǵa jáne federaldy agenttikterdi qaıta qurýǵa jol ashady, – delingen habarlamada.

Onyń aıtýynsha, jańa departament úkimetten tys usynystar jasaıdy, Aq úımen jáne bıýdjettik keńsemen «keń aýqymdy qurylymdyq reformalardy» júzege asyrý jáne úkimetke «buryn-sońdy bolmaǵan» kásipkerlik kózqarasty qalyptastyrý úshin jumys isteıdi.

Tramp sonymen birge Pentagon basshysy laýazymyna úmitkerdi usyndy. Bul laýazymǵa ol Fox News júrgizýshi jáne Gýantanamo, Irak pen Aýǵanstanda qyzmet etken armııa ardageri Pıt Hegsetti shaqyrdy.

– Pıt qatal, aqyldy jáne Amerıka bárinen de joǵary ekenine senedi, – dedi Tramp.

Aıta keteıik, buǵan deıin Ilon Mask Tramp ákimshiligindegi óziniń áleýetti rólin ashqan bolatyn.

Donald Tramp pen Ilon Mask áleýmettik jelini qalaı paıdalanýda.

Ilon Mask Trampty qoldaý úshin 200 mıllıon dollar jumsaǵan.