Tramp áskerı-áýe kúshteri basshysy laýazymyna kandıdatty tańdady

<p>ASTANA. KAZINFORM &ndash; Jańadan saılanǵan prezıdent Donald Tramp burynǵy ushqysh jáne Ulttyq barlaý basqarmasy dırektorynyń burynǵy orynbasary Troı Meınkti áskerı-áýe kúshteriniń basshysy qyzmetine taǵaıyndady, dep habarlaıdy&nbsp;<a href="https://abcnews.go.com/US/wireStory/trump-picks-former-air-crewman-space-expert-head-117762671" target="_blank" rel="noopener">ABC News</a>.</p>

Troı Meınktiń áskerı salada jáne ulttyq qaýipsizdikte memlekettik qyzmette, sonyń ishinde spýtnıktik jáne ǵaryshtyq barlaýmen baılanysty laýazymdarda tájirıbesi bar.

Kandıdatýrasy bekitilgen jaǵdaıda ol Donald Tramp prezıdent retindegi birinshi merziminde qurǵan AQSh Áskerı-áýe jáne ǵarysh kúshterin basqaratyn bolady. 

- Troı bizdiń eldiń Qorǵanys mınıstri qyzmetine tanymal kandıdatymyz Pıt Hegsetpen birge áskerı-áýe kúshterimizdiń álemdegi eń tıimdi jáne aıbyndy kúsh bolýyna kepildik etý úshin jumys isteıdi, óıtkeni biz kúsh arqyly beıbitshilikti qamtamasyz etemiz, - dep jazdy Donald Tramp Truth Social-da. 

Troı Meınk – Ońtústik Dakota shtatyndaǵy Lemmon qalasynyń týmasy. Áskerı-áýe kúshterinde KS-135 maı quıýshy ushaǵynda shtýrman bolǵan.

Ulttyq barlaý basqarmasynda ol jańa spýtnıktik tehnologııany satyp alý úshin 15 mlrd dollardan astam bıýdjetti qadaǵalady.

Buǵan deıin AQSh-tyń jańadan saılanǵan prezıdenti Donald Tramp Fox News jýrnalısi Temmı Brıýs AQSh Memlekettik departamentiniń baspasóz qyzmetiniń jańa basshysy bolatynyn málimdedi.