Tramp AQSh energetıka mınıstri qyzmetine Liberty Energy munaı kompanııasynyń basshysyn usynbaq

<p>AQSh-tyń jańadan saılanǵan prezıdenti Donald Tramp eldiń energetıka mınıstri qyzmetine Liberty Energy munaı kompanııasynyń basshysy Krıs Raıttyń kandıdatýrasyn usynbaq, dep habarlaıdy <a href="https://tass.ru/mezhdunarodnaya-panorama/22421841" target="_blank" rel="noopener">TASS </a>agenttigi.</p>

– Krıs – energetıka salasyndaǵy jetekshi tehnolog ári kásipker. Ol ıadrolyq, kún, geotermaldyq jáne munaı-gaz energetıkasynda jumys istedi, - dedi saılanǵan prezıdenttiń ótpeli toby senbide jasaǵan málimdemesinde.

Qujatta Raıttyń Tramp juma kúni jarııalaǵan Ulttyq energetıkalyq keńeske de qosylatyny aıtylǵan. Bul keńesti Soltústik Dakota gýbernatory Dýglas Bergým basqaratyn bolady, ol buǵan deıin Іshki ister mınıstrliginiń basshysy laýazymyna usynylǵan.

Amerıkalyq BAQ atap ótkendeı, Raıt Tramp sııaqty munaı óndirýdi arttyrýdy jaqtaıdy jáne qazbaly otyndy paıdalaný qajettigine senimdi.

«Álem munaı men gazda ómir súredi jáne bizge olar qajet», - dedi ol 2023 jyly CNBC-ge bergen suhbatynda.

Raıt Trampqa klımattyń ózgerýine qarsy kúreste jahandyq yntymaqtastyqtan bas tartýda qoldaý kórsetedi dep kútilýde, óıtkeni Liberty Energy basshysy parnıktik gazdar shyǵaryndylary planetanyń temperatýrasyn kóterip, tabıǵı apattar týǵyzatynyna senbeıdi.

Energetıka mınıstri laýazymyn qazirgi ýaqytta Djennıfer Granholm atqarady. AQSh-tyń Energetıka mınıstrligi eldiń ıadrolyq áskerı keshenine jaýapty.