Tramadol psıhotroptyq zattardyń tizimine enetin boldy

ASTANA. QazAqparat – 27 esirtki men prekýrsor ataýy memlekettik baqylaýǵa alynady. Bul týraly ІІM baspasóz qyzmetiniń ókili Shuǵyla Turlybek málim etti, dep habarlaıdy QazAqparat tilshisi.

«20 naýryzda Úkimet birqatar zańǵa táýeldi normatıvtik-quqyqtyq aktilerge ózgerister men tolyqtyrýlar engizýdi kózdeıtin aktige qol qoıdy. Ol qosymsha 27 esirtki men prekýrsor ataýyn memlekettik baqylaýǵa alýdy kózdeıdi. Qazirgi ýaqytta bul tizimde aınalymyn memleket baqylaıtyn myńnan astam zattar bar. Qazir oǵan esirtki men psıhotroptyń taǵy 15 ataýy, sondaı-aq prekýrsorlardyń 12 ataýy jáne olardy jasaý úshin qoldanylatyn zattar engizilgen», - dedi Shuǵyla Turlybek Іshki ister mınıstrliginiń baspasóz qyzmeti alańynda ótken brıfıng barysynda.

Onyń atap ótýinshe, «dárihanalyq» nashaqorlyqpen kúresý maqsatynda psıhotroptyq zattardyń tizimi tramadolmen tolyqtyrylady. Sondaı-aq psıhotroptyq analgetık te bar. Ony esirtkige táýeldiler eıforııa áserin alý úshin paıdalanady jáne tutastaı alǵanda ol esirtkige táýeldiliktiń qalyptasýyna yqpal etedi.

«Qylmystyq jaýapkershilikke tartylatyn tramadoldyń salmaǵy 0,1 gramm bolyp belgilendi. Bul shaǵyn ólshem, al 10 gramǵa deıin - úlken ólshem, 10 gramnan assa asa úlken ólshem sanalady. Úkimet aktisi qoldanysqa engizilgen soń tramadol tek retsept boıynsha jáne esirtki quraldary jáne psıhotroptyq zattar aınalymyna baılanysty qyzmetke lıtsenzııasy bar dárihanalyq jáne emdeý-profılaktıkalyq uıymdarda ǵana beriletin bolady.

«Tramadoldyń» zańsyz aınalymy úshin qylmystyq jaýapkershilik qoldanystaǵy zańnamaǵa sáıkes bastalady», - dedi ol.