«Tramadol koroliniń» ne úshin tutqyndalǵany belgili boldy
BQO polıtsııa departamentiniń bastyǵy Arman Orazalıevtiń brıfıngte málim etkenindeı, bıylǵy shilde aıynyń sońynda shaǵyn nesıe berý mekemesine alaıaqtyq jasalǵany jóninde aryz túsken.
Arman Moldııarulynyń sózine qaraǵanda, atalmysh shaǵyn nesıe berý uıymy avtokólikti kepilge ala otyryp nesıe bergen, ıaǵnı kepil berýshi kelisim-shart jasap, nesıe alǵannan keıin óz kóligin júrgize alǵan. Aryzda kepilde turǵan úsh kóliktiń satylǵany kórsetilgen.
Atalǵan derek negizinde QR QK 190-baby 3-bóligi boıynsha (adamdar tobynyń aldyn ala sóz baılasýymen iri mólsherde jasalǵan alaıaqtyq) sotqa deıingi tergep-tekserý jumystary júrgizilýde.
Sotqa deıingi tergeý jumystary aıasynda shaǵyn nesıe berý mekemesinde kepilde turǵan 3 avtokóliktiń satylyp ketýine K. jáne basqa da adamdardyń (barlyǵy beseý) qatysy bar ekeni anyqtaldy. ıAǵnı olar aldymen avtokólikterdi kepil retinde qoıyp, nesıe alǵan. Keıin kepilde turǵan avtokólikterdi Qazaqstannan shyǵaryp, kórshi elde satyp jibergen.
Kúni búginge shaǵyn nesıe berý mekemesine keltirilgen shyǵyn 15 mln teńgeden asady.
«Bıylǵy 2 qyrkúıek kúni «K» QR QK 190-baby 3-bóligine sáıkes qylmystyq quqyq buzýshylyq jasady degen kúdikpen ustalyp, ýaqytsha ustaý ızolıatoryna qamaýǵa alyndy. Úsh býyndy modelge sáıkes kúdiktiniń is-áreketi atalǵan bappen saralanyp, oblys prokýratýrasy bekitti. Keshe sottyń sheshimimen kúdiktige qatysty 2 aı merzimge kúzetpen ustaý túrindegi bultartpaý sharasy sanktsııalandy. Qazirgi ýaqytta olardyń osyǵan uqsas kepilde turǵan avtokólikterdi jymqyrý derekterine qatystylyǵy tekserilýde. Sotqa deıingi tergep-tekserý aıaqtalǵannan keıin qosymsha málimet beriletin bolady. Atalǵan bapqa sáıkes úsh jyldan jeti jylǵa deıin bas bostandyǵynan aıyrý jazasy qarastyrylǵan», dedi A.Orazalıev.
Departament bastyǵy N.Karpovtyń topty uıymdastyrýshylardyń biri retinde tergelip jatqandyǵyn, qalǵan qatysýshylarǵa qatysty qandaı bultartpaý sharasy qoldanylatyny tergeý barysynda sheshiletinin jetkizdi. Ol sondaı-aq kúdiktiniń bul isi qazirgi ýaqytta esirtki qylmystaryna qatysy joqtyǵyn aıtty.
Eske sala keteıik, budan buryn «tramadol koroline» qamqorshylyq jasaǵan BQO polıtseılerine úkim shyqqanyn jazǵan bolatynbyz.
Sondaı-aq Oralda «tramadol koroli» ýaqytsha ustaý ızolıatoryna qamaldy.