«Tramadol koroline» qamqorlyq jasaǵan BQO polıtseılerine úkim shyqty

ORAL. QazAqparat – Oral qalalyq sotynda Batys Qazaqstan oblysy Polıtsııa departamenti esirtki bıznesimen kúres basqarmasynyń burynǵy qyzmetkerleri Rýslan Qazmaǵambetov pen Nurlan Demenovke úkim shyqty, dep habarlaıdy QazAqparat tilshisi.

BQO sotynyń baspasóz qyzmetinen málim etkenindeı, R.Qazmaǵambetov pen N.Demenov QR QK 366-baby 3-bóligi 2-tarmaǵyna (adamdar tobynyń aldyn ala sóz baılasýymen para alý) sáıkes aıypty dep tanyldy.

Olardyń árqaısysyna paranyń 60 eselengen mólsherinde 18 mln teńgeden aıyppul salynyp, memlekettik qyzmette laýazym ıelený quqyǵynan ómir boıyna aıyryldy. R.Qazmaǵambetov pen N.Demenovtiń qamaýda jáne sodan keıin úı qamaǵynda bolǵan merzimi eskerilip, aıyppul kólemi 952 200 teńgege tómendetildi.

Sonymen qatar R.Qazmaǵambetov polıtsııa maıory, N.Demenov polıtsııa kapıtany shenimen qosh aıtysty.

Úkimdi jarııa etken sýdıa Gúlnara Gımadýtdınovanyń túsindirýinshe, sottalýshylardyń Oral qalasynda tramadol satatyn núktelerge qatysy bolǵany anyqtaldy. Atap aıtqanda, qalada «tramadol koroli» atanyp ketken Nıkolaı Karpovtiń zańsyz saýdamen aınalysatynyn bile tura, oǵan qamqorshylyq kórsetken. Olardyń 300 myń teńge kóleminde para alǵany dálelin tapty.

Sot úkimi zańdy kúshine engen joq.

Sottalýshylar úkim zańdy kúshine engennen keıin aıyppuldy bir aı ishinde tóleýi tıis.

Eske sala keteıik, budan buryn para aldy dep aıyptalǵan polıtsııa sheneýniginiń 5 jylǵa sottalǵanyn jazǵan bolatynbyz.